Isumat.com/1:53PM, Abril 7, 2021
Usa nala ka tuig ngan piniliay na sanglit nagtitikapaso na an pulitika ug an magti-ayon nga hira Richard Gomez ngan Lucy Torres-Gomez in sugad-sugad nga nakagdesisyon na han mga pwesto nga ira pupuntiryahon ha Mayo 2022.
Sumala han report han Krusada ngan Ormoc News and Updates, iginpasamwak yana nga adlaw ni Ormoc City Mayor Gomez nga makandidato hiya ka kongresista ha 4th District han Leyte, samtang an iya misis nga hi Lucy in madalagan ka-mayor han syudad.
Ini nga anunsyo ni Gomez an iya ginhimo samtang nagsasa-urog hiya han iya kaadlawan yana nga adlaw.
Hi Mayor “Goma” in aada yana han ikaduha nga termino komo alkalde han Ormoc, pero deri na hiya matarget han ika-tulo nga termino ngan makikiglantugi hiya ha pagka representante han ira distrito.
Ini nga distrito han Leyte amo an ginkakaptan yana ni Lucy nga aada han iya ikatulo ngan katapusan nga termino.
Pira na ka bulan an nakalabay, hi Lucy in ginkunokuno nga may plano pagkandidato ka senador, pero tungod hini yana nga pasamwak, nagawas nga magbabalyu-ay la hin posisyon an poderoso, bantog ngan bahandi-anon nga mag-asawa. #
