Isumat.com/9:00AM, June 11, 2020
Nananawagan an Rural Health Unit han Matalom, Leyte ngadto han ira mga bungtuhanon nga magin kalmante ngan deri mag-panic. Ini an hangyo han buhatan ha publiko katapos la ig-anunsyo han DOH Regional Office kagab-i nga mayda residente han bungto an nag positibo han COVID-19.
Nagsering an RHU nga an angay himoon han katawhan amo an deri pag-panic, igpadayon an pagsunod han mga health protocols ngan mag-ampo para han katalwasan han ngatanan.
Iginreport han RHU nga an Positive Case ha ira bungto in na-stranded ha Cebu ngan naka-uli ha ira lugar hadton Hunyo 7. An iya swab sample an ginproseso kakulop ha laboratoryo ngan gumawas an resulta nga natapnan hiya han virus.
Nagsering pa an RHU nga an pasyente in aadto na yana ha Isolation Facility han LGU ngan tikang han iya pakabalik, waray pa hiya igka-urusa hin bisan hin-o kay deretso man hiya iginkadto han Quarantine Area. An pasyente in nagpapabilin nga aada ha maupay nga panlawas ngan waray sintomas han sakit. Ini an syahan nga kaso han corona virus dida han bungto.
Ginklaro pa han report nga an virus in nadara han pasyente tikang ha Cebu ngan deri angay pagsayupon ini nga tawo kay deri man hiya maaram nga nakapurot na hiya han kagaw han iya pag-uli. Kasumpay hini, nanawagan an RHU ha ira mga bungtuhanon nga kinahanglan waray deskriminasyon ngadto han nasabi nga pasyente. # (KEVIN SIOSANA)
