Naghahangyo an Rural Health Unit (RHU) han Javier, Leyte ha publiko nga deri magpinasarang hin mga sumat-sumat nga waray beripikasyon tikang ha mga otoridad.
Nagdig-on an RHU-Javier nga waray kamatuoran an mga nagsasarang nga impormasyon ha facebook nga mayda na daw tawo nga positibo han corona virus ha ira bungto. Igindugang pa han RHU nga deri gihapon tinood an mga hurob-hurob nga an COVID Positive ha Burauen in may bugto nga naukoy ha usa nga barangay ha Javier.
AN RHU ug an mga opisyales han barangay an naningkamot pagsusi hini nga mga isyu ug nagawas nga waray hini kamatuoran.
Kasumpay hini, nanawagan an opisina ha mga mulopyo nga kun may nasasagap nga mga impormasyon labi na kun mahitungod han virus, ig-beripikar anay ini ha LGU o ha RHU basi maseguro kun tinood ini. Kinahanglan tikang hin otorisado ngan katatapuran nga surok an impormasyon antis pa ini igpinasarang basi deri ini magin kawsa hin pag panic han mga residente, pahayag pa han RHU.
Nagpapadayon naman an panawagan han RHU-Javier ha ira nasasakupan nga deri mag ginawas-gawas han ira tagsatagsa nga panimalay ngan magsunod pirmi han mga kasalagdunan basi makalikay han corona virus.
An RHU-Javier an nagpagawas hini nga official statement pinaagi han ira facebook account kanina han pasado alas 12 han udto.
(Posted 2:40 PM, April 18, 2020)
