Isumat.com/12:53PM, Enero 18, 2021
Deri magkakaada hin dagko nga industriya ngan manufacturing companies an Eastern Visayas kun waray international seaport ngan international airport ha aton dapit, sumala kan Eugene Tan, Presidente han Philippine Chamber of Commerce and Industry (PCCI) Tacloban-Leyte.
Dida han interview ha iFM-RMN Tacloban, nagsering hi Tan nga hapagkayana harayo pa an posibilidad para lumangbo an manufacturing industry ha Rehiyon Otso tungod nga waray man international seaport ngan international airport.
Ini nga mga facilidadis in kinahanglan nga matukod basi an mga kapitalista o magdudumara han kompaniya in deri kukuri-an pagbiyahe han mga higamit ngan materyales nga gagamiton ha mga pabrika ngan industriya.
Sumala pa kan Tan, kun aadto la ha Manila ngan Cebu madunggo an dagko nga barko ngan mga eroplano nga kakargahan han mga epektos, mahal hin duro an balor han transportasyon kay igbibiyahe pa ini nganhi ha rehiyon. Maupay unta kun aanhi mismo ha Eastern Visayas an international airport ngan seaport kay makakamenos han gastos ngan makaka-aghat ini hin mga investors.
Dida gihapon han mao nga interview, nagpabati hin pagtoo hi Tan nga waray mga negosyante ha aton dapit nga nagpapasulabi han presyo han mga papliton ngan iba pa nga produkto. Ini an iya reaksyon kasumpay han higtaas nga presyo han papliton tikang pa hadin Disyembre tobtob yana nga mga panahon.
Sumala ha iya, an hitaas nga presyo in igindidikta han mga suppliers. Kun mahal an pagpalit mapatubo gihapon an mga negosyante. Nagsering pa hi Tan nga kulang hin supply an mga produkto yana tungod han mahinay nga pagdeliver han mga produkto tikang ha iba nga nasud tungod han pandemya.
Usa gihapon nga rason han pagmahal han presyo amo an epekto han sunod-sunod nga kalamidad nga nakadaot han mga produkto ha agrikultura ngan nakakapadugay han pagbiyahe han mga produkto tungod han mga landslides ngan baha.
Iya iginpananglitan an pagtabok han mga trak ha Matnog tikanhi ha Region 8 kun diin usahay inaabutan hin usa ka semana antis makasakay ha ferry boat an mga trak han produkto. Tungod han gastos ha transportasyon, napipiritan an mga truckers pag-umento han presyo, sanglit marumahal an delivery. #
