Maupay ngan deri maupay nga notisya an iginpasamwak yana nga kulop han Department of Health-Region 8. Amo ini an usa ka tawo nga nahidugang dida han nag positibo han corona virus, ug duha nga pasyente nga naka-recover.
An bag-o nga positibo in usa nga babaye, 60 anyos, taga Tarangnan, Samar. Kaupod hiya ha trabaho ha Tarangnan Community Hospital han ikaduha, ikatulo ngan ika-upat nga COVID patients. Nagpakita hiya hin sintomas hadton Abril 11, ug ginkuhaan hiya hin samples ug nagpositibo ini. Hapagkayana, igbabalhin hiya ha EVRMC ha pagpadayon han pagtambal.
An maupay naman nga notisya kay naka-recover na an duha nga taga Tarangnan, Samar. Duha na ka beses nga nag negatibo an ira samples salit nakatalaan hira gumawas ha hospital buwas, pero magka-kwarentina pa ha ira balay hin 14 ka adlaw.
Dara hini, 6 na ka tawo an COVID Positive ha Eastern Visayas. An syahan nga taga Catarman naka recover na; an ikaduha nga taga Calbayog naka recover na gihapon; an ikatulo ngan ika-upat nga taga Tarangnan magawas na ha hospital kay naka recover na gihapon; an ikalima an babaye tikang ha Burauen; ug an ika-unom ini nga babaye tikang ha Tarangnan.
Maupay gihapon nga sumat kay an lima ka tawo nga close contacts han Burauen patient in negatibo an laboratory test. Mayda pa usa nga close contact nga bag-o pala nga ginkuhaan han sample ngan igpapadara pala ha Cebu para han confirmatory test.
Ini nga mga resulta han confirmatory test ha Cebu in tikang han Batch 10 ginkokomponer hin 58 samples. Iginpadara ini ha Cebu kakulop (Abril 19) ug yana nga adlaw umabot an resulta, ug amo ini nga usa la an positibo – an 60 anyos nga babaye ha Tarangnan.
Iginpahayag pa han DOH nga nag momonitor pa hira hin 32 ka tawo nga iginka-urusa han pasyente nga taga Burauen. #
(Posted 4:38 PM, April 20, 2020)
