Isumat.com/9:15AM,April 28, 2020
Namatay in usa nga rebelde nga kaapi han New People’s Army dida hin enkwentro kontra han mga tropa han gobyerno kakulop, Abril 27, didto hin tay-aw nga lugar ha Catubig, Northern Samar.
Subay han report han 8th Infantry Division han Philippine Army, an mga kasundalohan han 20th Infantry Batallion in iginkahibalag hin maabot napulo nga mga rebelde ha Brgy Rebadulla han nasabi nga bungto. Dida hini, nagkaada hin binalyu-ay hin bala nga humagos hin singko minutos tobtob nga kumalagiw an mga kaaway han gobyerno.
Dida han aragway, namatay in usa nga rebelde ug narekupo han mga sundalo in usa nga sub-machine gun, usa nga magazine ngan mga bala hin 9mm. Waray naman nasamaran o namatay ha panig han Army.
Nagtotoo an mga sundalo nga ini nga mga rebelde amo la gihapon an grupo nga ira iginka-aragway dida han Abril 23 dida gihapon han nasabi nga barangay kun diin nakuha han Army in usa nga kampo han NPA ngan naka-recover hin unom nga pusil.
Nagpahayag an Philippine Army nga deri unta ini matatabo kun an mga rebelde in namamati han panawagan han gobyerno nga bumalik na ha piyod han balaud ngan makatagamtam han mga programa ha ilarum han Enhanced Comprehensive Local Integration Program (E-CLIP).
Ginseguro gihapon han mga tropa han gobyerno nga deri hira mahunong han paningkamot nga magkamay-ada na hin tim-os nga kamurayawan ug ira gindayaw an kooperasyon han mga sibilyan dida hini nga ira misyon.#
