Isumat.com/ Nobyembre 23, 2022
Tungod han pagkumbinser han iya iroy, bumalik ha piyod han balaud in batan-on nga kaapi han New Peoples’ Army ha Calbiga, Samar kun diin iya igintubyan an iya kalugaringon nga pusil ngan igintutdo ha militar an lugar nga gintatagu-an hin kadam-an nga armas de fuego.
Ha report han Philippine Army 8th Infantry Division, ginkilala an nagsurender nga hi Anthony Encinas, alyas Aljur, 19 anyos ngan miembro han Squad 3, Bugsok Platoon han NPA nga may operasyon ha mga bungto han Sta Rita, Calbiga, ngan Pinabacdao ha Samar.
Hi Encinas in nagtubyan han iya 45 kalibre nga pusil. Narekupo naman han militar in 18 pa nga high-powered firearms ha Brgy Sinalangtan, Calbiga nga amo an igintutdo han rebelde nga ginhipusan han mga armas.
Ini in naglalakip hin unom nga M-16 rifles, upat nga M-14, upat nga AK-47, usa nga shotgun, usa nga KG-9, usa nga 38 kalibre nga pistola, ngan usa nga M-79 grenade launcher. Nakuha gihapon han militar in 14 nga magazines hin AK-47.
Antis ini nga pagsurender, an 801st Infantry Brigade ha panguna ni Col Lenart Lelina in nagdumara hin pakighimangraw upod han anay mga rebelde ngan mga kag-anak ngan paryente han aktibo nga mga rebelde ha Calbiga, Samar.
Dida hini nga mga pulong-pulong, an iroy ni Encinas in nakatambong ngan iya nasayuran nga abri an gobyerno pagkarawat han masurender ngan katatagan pa hira hin mga benipisyo. Ini an nakagduso ha iya nga kumbinseron an iya anak nga sumurender na.
Hi Lelina in nagsumat nga hi Aljur in makakarawat hin porlomenos 1 Milyon pesos tungod han iya pagsurender ngan pagtubyan han mga armas.
Kasumpay hini, an Philippine Army ha Region 8 ha liderato ni Major Gen Camilo Ligayo in nagdayaw han paningkamot han mga kasundaluhan sugad man han mga sibilyan nga magburublig para han kamurayawan.#
