Isumat.com/2:16PM, May 18, 2020
Waray plano hi Mayor Alfred Romualdez nga magdumara hin Rapid Anti-Body Testing ha mga gintatahapan nga natapnan han corona virus denhi ha Tacloban City.
Ha usa nga pakighimangraw ha mga kaapi han media yana nga kulop, gintagan hin duon ni Romauldez nga deri kinahanglan an Rapid Test ha syudad kay mayda man denhi mga otorisado nga laboratoryo nga makakag kumpirmar kun in usa nga tawo natapnan han makamaratay nga kagaw.
Sumala han alcalde, aada man an EVRMC Molecular Laboratory ug an Divine Word Hospital Laboratory nga puede magdumara han confirmatory test.
Kadungan hini, gindig-on ni Romauldez nga an angay lugod himoon amo an pagpadayon han istrikto nga pagsunod han mga health protocols sugad han pagsul-ot hin face mask, pagigin malimpyo ha lawas ngan social distancing. Sering pa niya mas importante an paghirot kontra han rapid testing.
Kuna ton manunumduman, pira na nga LGUs ha Rehiyon Otso an nagdumara hin Rapid Test ha mga Suspected Cases han Covid-19, pero haros ngatanan han positibo ha Rapid Test, negatibo an resulta ha confirmatory test.
Iya pa iginsumat nga deri na niya gusto nga igpa-ilarum na liwat ha lockdown an Tacloban kay duro an epekto hini ha ekonomiya ngan pagpakabuhi. Pero matutuman la ini kun magpapabilin an paghirot han ngatanan basi deri matapnan han virus.
Iya utro ginpanawagan an publiko han pirmi paggamit hin face mask ngan igpatuman an social distancing labi na ha pampubliko nga mga lugar. Nag-aghat hiya nga igreport ha kapulisan an bisan hin-o nga makikit-an nga waray face mask ha pampubliko nga lugar basi dakpon han mga otoridad.
Nag warning gihapon hiya ha mga establisemento nga kun mayda makit-an han mga otoridad nga nagpapasulod hin waray face mask nga mga tawo ha mga tindahan, papasadhan niya ini nga mga establisemento.
Aminado hi Romualdez nga ha iya pag libot-libot han syudad nakakakita la gihapon hiya hin pira ka tawo nga deri nagsusunod han health protocols.
Igindig-on han amay han syudad nga kinahanglan gud in inga face mask labi na gud nga posible magtikang na pagka-abot an mga mulopyo nga Balik-Tacloban yana nga semana. # (KEVIN SIOSANA)
