Isumat.com/8:52AM, May 30, 2020
Katapos hin duna ka adlaw nga pagtinago, nadakop na han mga otoridad an suspetsado han panlugos ngan pagpatay hin usa nga babaye ha Naval, Biliran.
Sumala han impormasyon tikang kan PMajor Eriprando Castilla, Naval Chief of Police, ginkilala an suspetsado nga hi Clinton Villarin alias Bebe, 19 anyos, laborer, ngan taga Brgy Tamarindo. Hiya an nasikop han mga kapulisan pinaagi han pagsumat han barangay kapitan han Santisimo Rosario kun diin natabo an krimen.
Hadin Mierkules han gab-i, hi Villarin in nag-inom didto han karaoke bar nga gintatrabahu-an han biktima nga hi Michelle Flores, 24 anyos. Nag-asoy an suspetsado nga usa na ka tuig nga mag-oyab hira ngan han biktima. Katapos han trabaho ni Michelle hadto nga gab-i, nag sudoy-sudoy daw hira ngan nahingadto hira ha may bodega han LBC.
Pinanhimuwa ni Villarin nga iya ginlugos an biktima pero aminado hiya nga naghilawas hira hadto nga gab-i. Nagka-ada hin mapaso nga argumento an duha mahitungod hin kwarta. Nagsering hi Villarin nga nahangit hiya kay pirmi daw la ginsisina-aran hiya ni Michelle nga mahatag hin kwarta kay waray hiya klaro nga pakabuhi, pero deri natutuman han daraga an iya saad.
Sering han suspetsado, waray na niya makontrol an iya ka-aringit ngan iya ginsuntok ngan iginmalmal an ulo han biktima. Iya pa ginsaysay nga deri hiya hubog hadto nga takna ngan naka-inom la hiya.
Katapos han insidente, iya ginbayaan an patay nga lawas ni Michelle ngan umuli na. Pero an kapulisan an waray tumukal han imbestigasyon ngan ira na nakilal-an an nawong han suspetsado dida han mga CCTV footage.
An suspetsado in nakabati na han mga iru-istorya nga nakit-an hiya ha CCTV ngan nagsumat ha iya tatay nga karuyag niya sumurender. An kapulisan in nakatoltol naman kun diin hiya nagtitinago sanglit ginkadto hiya ngan gin-aresto.
Sumala kan Major Castilla, magsasampa hira hin kaso nga rape with homicide kontra han suspetsado. # (KEVIN SIOSANA) – with report from Biliran Island News.
