Imbes nga magpa-ilarum han kuarentina, nanmasyada lugod ngan nakig-inom pa gud in usa nga Person Under Monitoring (PUM) ha Gandara, Samar….an resulta, gin-aresto hiya ngan ginpaslak ha karsel.
Ginkilala an nagpinasaway nga PUM nga hi Orlan Geraldo, 40 anyos, ngan residente han Brgy Catorce de Agosto han Gandara. Hinsabutan nga ini hi Geraldo nga construction worker, in gintudlok nga PUM kay inabot hiya ha ira bungto tikang ha Valenzuela City, Metro Manila usa ka semana na an nag-agi.
Ginsagdunan hiya han mga opisyal han barangay nga magpatuman han 14-day quarantine period ha ira balay, pero dida han Marso 20, nagsudoy-sudoy ini ngan nakigtagay pa gud upod an pira niya nga kasangkayan.
Sumala kan Gandara PNP chief PCapt. Joselito Tabada, nakakarawat hira hin tawag nagsusumat kasumpay han ginbibinuhat ni Geraldo, sanglit kadagmitan nira ini nga ginsikmit ngan ginpreso. Namimintana yana an posibilidad nga magbakasyon an suspetsado ha karsel hin unom ka bulan ngan magmulta hin 50 mil pesos kun mapamatud-an nga nakatalapas han Republika Acta 11332 o an “Mandatory Reporting of Notifiable Diseases and Health Events of Public Health Concerns Act.” #
