Isumat.com/7:41AM, Enero 23, 2021
Personal nga balingkutay an gintutumbok nga motibo han mga imbestigador kasumnpay han gin-aalegar nga pagpusil hin anay pulis han iya amyaw ha Brgy San Antonio, Alangalang, Leyte.
Dida han inisyal nga imbestigasyon han mga otoridad, ginkilala an biktima nga hi Jay Barrantes, 36 anyos, inasaw-an; samtang an suspetsado hi Jose Richell Collado, 63 anyos, inasaw-an ngan retirado nga PNP Member. Hira ngaduha in mga residente han mao nga barangay. An ira tagsatagsa nga balay in magluyo la.
Sumala han report, natabo an shooting incident pasado alas 4 han kulop, Enero 22, 2021. An biktima in nag-antos hin igo hin bala ha wala nga tiil ngan yana gintatambal ha usa nga hospital ha Tacloban City.
Hi Collado in aada ha kustudiya han Alangalang PNP ngan gin-aadman pa yana han kapulisan an kaso nga igsasalawad kontra ha iya.
An suspetsado in nagpresentar hin kalibre 45 nga pistola nga amo an gintotoohan nga gingamit han pagpusil. Nagpakita gihapon hiya hin mga papeles pagpamatood nga lisensyado an iya armas.
Nagsering pa an imbestigador nga mayda pa usa nga pistola nga natad-an sapit han biktima ngan ginpapanginano kun hin-o an tag-iya hini.
Igindugang pa han report nga han aga hadto nga adlaw, igin-aligar ni Collado nga ginkasahan hiya hin pusil ni Barrantes ngan iya ini iginparekord ha barangay. #
