Magdudumara hin checkpoints ngan suspendido na an mga klase ha probinsya han Biliran. Ini in subay han iginpagawas nga Executive Order ni Gov. Rogelio Espina.
Ha ilarum han kamanduan, maghihimo hin checkpoints an Biliran Task Force Covid-19 ha Biliran Bridge kun diin amo ini nga tulay an entry point han land transporation tipasulod ha Biliran.
Mayda gihapon chechpoint ha pantalan han Naval nga amo an capital han Biliran nga amo an dinudungo-an han mga sarakyan pandagat tikang ha iba nga lugar. An mga beyahero nga masulod han probinsya pinaagi han Biliran Bridge ngan Naval Port in kinahanglan mag fill-out hin health form kun diin igsusurat an kinahanglan nga mga impormasyon nga posible magamitan ha oras hin remalaso hito nga indibiduwal.
Kasumpay hini, nanawagan an Gobernador nga kun may mga tawo nga deri magsusunod hini nga kamanduan, deri nala mag pruweba pagsulod ha ira probinsya.
Iginmando gihapon han amay han probinsya nga suspendido na an klase ha ngatanan nga levels han mga eskwelahan ha ira lugar tikang Marso 16 tobtob nga maseguro nga waray na hulga an COVID-19.Ginsagdunan naman ni Espina an mga kag-anak nga deri tugutan an ira mga anak nga magkinalakat ha bisan diin la nga lugar yana nga waray na klase basi makalikay ha peligro.
Upod gihapon dida han executive order nga maghimo an ngatanan nga LGU han probinsya hin local quarantine area ha ira tagsatagsa nga bungto komo pangandaman kun may matabo nga local transmission han sakit.
Mahugot gihapon nga lilimitaran an pagbyahe tigawas han Biliran an mga opisyal ngan empleyado han probinsya. Bisan an pribado nga mga inidibiduwal in ginhangyo ni Espina nga deri la anay unta bumyahe ha iba nga lugar kun deri gud kinahanglan hin duro.
Nanawagan gihapon an pamunuan han probinsya ha mga Biliranon nga deri na maghimo hin mga aktibidadis o katitirok nga masobra hin 50 ka tawo an ma-atender, sanglit ginkanselar na gihapon an mga aktibidadis kasumpay han pagsa-urog han Biliran Provincehood Anniversary hiton Mayo 11. Ini in agud makabulig basi deri magsarang an virus. #
