Isumat.com/6:53AM, Enero 29, 2021
Maatubang hin mga kaso kriminal an usa prinsipal hin eskwelahan ha Northern Samar tungod han karekupo ha iya posesyon hin armas de fuego ngan granada.
Dida han report han Northern Samar PNP, ginkilala an suspetsado nga hi Nestor Ada, 55 anyos, residente han Brgy San Miguel, Laoang, Northern Samar. Hi Ada an prinsipal ha Rosario National High School ha bungto han Rosario han mao gihapon nga probinsya.
An mga tinubyanan hin balaud in nakakuha hin search warrant tikang ha korte sanglit nakagdumara hira han pagronda didto han quarters ni Ada han eskwelahan kakulop han aga (Enero 28, 2021). Dida han raid narekupo han mga otoridad in usa nga kalibre 45 nga pistola, usa nga magazine, upat nga bala ngan usa nga granada.
Nagsering hi PNP Provincial Command Chief Col Arnel Apud nga ini nga ira aksyon in kaparte han paningkamot nga deri na magsarang an layaw nga armas didto han lalawigan.
Ini nga panhitabo in mahugot naman nga ginkondenar han Alliance of Concerned Teachers (ACT)- Eastern Visayas. Sumala han grupo an ira miembro nga hi Ada in biktima hin pagtanom hin ebidensya. Igindig-on han ACT nga para ha ira, waray kamatooran an mga alegasyon kontra han prinsipal.
Igindugang pa han grupo nga klaro man yana nga an mga otoridad in may kampanya kontra han mga kaapi han unyon ngan progresibo nga mga hugpo, sanglit deri imposible nga himo-himo la an ebidensya ngan may motibo politikal an insidente.
Pira gihapon nga mulopyo an napa-usa kay ha ira pagkilala kan Ada, deri niya ini mahihimo tungod kay matadong daw an pagkatawo hini. Nahisumat pa nga hi Ada in usa nga pastor hin usa nga sekta relihoyoso.
Hapagkayana, an suspetsado in aada ha kustudiya han kapulisan samtang nagpapamulat han disposisyon han iya kaso. #
