Tinikangan September 1, 2019 an operation han Leyte Metropolitan Water District (LMWD) in pag dudumaraon na han Prime Water Corporation nga guin tatag iyahan han Villar Group of Companies.
Ini an guin sumat ni Mr. Pastor Homeres an General Manager han LMWD ha interview haiya han 99.1 RMN Tacloban ha programa nga “Straight to the Point” ni Eduard Sanagan.
Sumala kan Homeres nga 25 years an kontrata han prime water Corporation ngan LMWD nga may panuyo nga mapa darudali an pag patuman han mga expansion projects ngan pag ayad han mga ka daan ngan mga depektibo na nga mga linya han tubig ha service area han LMWD.
Magastos hin 4 Billion pesos an Prime Water ha sakob hin 25 years ngan mahatag nala hin share ha LMWD kada tuig labot la han plite han mga pasilidadis nga gagamiton han korporasyon subay han guin kasarubatan dida han kontrata.
Kon pira liwat an ihahatag nga share kada tuig ha LMWD in waray ini ig sumat ni Homeres mahitungod nga mag sasarit pa hiya hiton Board of directors han LMWD.
Guin klaro ni Homeres nga partnership ngan deri privatization an ma tatabo nga pag dumara han operasyon han LMWD . Mag papadayon pa an ira serbisyon pero an obligasyon nala han LMWD Management ngan han Board of Directors amo an masiguro nga an Prime Water in matuman han mga kasarubutan han ira partnership.
An kontrata in aprubado na han National Economic and Development Authority (NEDA) sugad man han Local Water Utilities Administration (LWUA) ngan han opsina han Government Corporate Council sumat pa ni Homeres.
An mga empleyado naman han LMWD in may duha nga pag pipilian. Pwede hira mag early retirement o mag padayon pag trabahaho pero ha ilarom na han pag dumara han Prime Water.
Tatagan hin retirement package adton mag reretiro hin sayo hin bale kanan duha ka bulan hin tunga nga sweldo ha kada tuig nga pag serbisyo han LMWD sumala pa kan Homeres.
