Isumat.com/Nobyembre 23, 2021
Waray pa ngani makakatukdaw an mga mulopyo tikang han sakripisyo tungod han pandemya, aadi na liwat hin bag-o nga kalbaryo nga papas-anon han mga taga Sinirangan Bisayas – hitaas nga umento han presyo han papliton.
Mabido-on nga iginpahayag han Philippine Chamber of Commerce and Industry (PCCI) Tacloban-Leyte Chapter nga mapipiritan an mga negosyante pagpa-umento han presyo han ira mga baligya tungod han tigda nga paghitaas han taripa nga ira ginbabaydan ha mga produkto nga igindudu-ong ha Pier han Tacloban.
Ini nga umento han taripa in resulta han pagbag-o han nagdudumara han operasyon han nasabi nga pantalan kun diin an Global Port an nagkakapot na yana han operasyon han matapos an kontrata han Leyte Integrated Port Services Inc (LIPSI) pira na ka semana an nakalabay.
An Global Port in nagpa-umento han taripa tikang ha 50 tobtob 570 porsyento han mga kargamento nga naagi ha Tacloban Pier.
Tungod hini, waray mahihimo an mga negosyante kundi magpa-umento liwat han presyo han papliton ug an duro nga madadagmalan hini amo an mga kunsumidor, sering pa han PCCI.
Partikular nga mag-uumento an presyo han semento, bugas, tubong, fertilizers, harina, asukar, grocery items ngan damo pa nga iba.
Iginkakabido han PCCI nga nagpa-umento dayon han taripa an Global Port nga waray man la kunsultasyon han apektado nga mga sektor. Waray gihapon pasabuta an PCCI han magdumara hin bidding para han bag-o nga operator han pier.
Napapa-usa gihapon an grupo kun kay-ano nagpa-umento han taripa ha pier nga waray man natabo nga upgrading o pagpa-upay han mga facilidadis ngan ekipahis ha pier. Sumala han PCCI an mga kadaan nga higamit han LIPSI amo la gihapon an gingagamit han Global Port. Nagpapaki-ana an PCCI kun nahinganga-in an umento han taripa.
Sering pa han hugpo, bug-os nga rehiyon an apektado hini kay an Tacloban an sentro han negosyo, sanglit kadam-an nga negosyante in aadi ha Tacloban nakuha han ira mga produkto.
An PCCI in nagsurat ha Malacanang, Regional Development Council ngan iba pa nga ahensya han gobyerno basi maghatag hin kadagmitan nga pitad agud mabati-an an araba han mga negosyante ngan iba pa nga sektor.
Nagpadangat gihapon hira hin komunikasyon ha mga gobernador ngan mga mayors denhi ha Eastern Visayas mahitungod hini nga isyu.
Ginhihingita han grupo nga mahibalik an kadaan nga taripa ha pier o maghatag hin kasayuran an Global Port kun ano an mga rason han pag-umento han taripa. #
