Isumat.com/11:16AM, November 3, 2020
Gindudumara na yana an halarom nga imbestigasyon kasumpay han nahi-report nga pagpakamatay hin usa nga Policewoman ha Tagapul-an, Samar.
Dida han panguna nga imbestigasyon, an biktima nga ginkilala nga hi Patrolwoman Floradim Tegero, 28 anyos, may asawa, residente han Burauen, Leyte ngan nakadestino ha Tagapul-an PNP Station, an gin-aalegar nga nagpusil han iya kalugaringon banda alas 3 han maagahon, Nobyembre 3, ha sulod mismo han estasyon han pulis.
Hadto nga takna, hi Tegero ug an iya kaupod nga hi Sgt Cresilda Voz in naka-duty ha estasyon ngan naka-pwesto hira ha may entrance han opisina. Sumala kan Voz, an biktima in sumulod han estasyon ngan ginparong an suga. Kataliwan la hin pira ka segundo, hi Voz in nakabati hin pagbuto ngan nakabaho hin kanan pulbura tikang dapit ha may lock-up cell.
Ginpasigaan ni Voz hin flashlight an lugar ngan iya nakit-an hi Tegero nga nakulob ha salog ngan nag-aawas an dugo ha iya ulo.
Kadagmitan tumawag ha Rural Health Unit an sarhento basi mangaro hin bulig ug hi Dr. Ian Cesar Norombaba an nanginano han biktima ug nagdeklarar nga waray na kinabuhi hi Tegero.
Nakuha tikang ha lugar han insidente an 9mm nga pusil han biktima ngan mga bala. An Municipal PNP Station in nakigsumpayan na ha SOCO (Scene of the Crime Operatives) basi maghimo hin mas hingpit nga imbestigasyon.
Waray liwat impormasyon tobtob han ginsusurat ini nga notisya kun mayda ba natad-an nga suicide note o mga pahayag hin depresyon o problema an biktima antis an panhitabo. #
