Isumat.com/7:48AM, September 7, 2020
Iginbuyagyag ni City Disaster Officer Brando Bernadas nga mayda mga Positive Cases denhi ha Tacloban nga amo pa an nag-iisog kun ginkukuha ha ira balay basi dad-on ha mga Isolation Centers han syudad.
Nagsering hi Bernadas nga na-obserbaran nira nga pira nga natapnan han virus in deri na-kooperar ngan nagdidig-on nga didto la hira han ira balay. Pero ginklaro ni Bernadas nga nakukumbinser gihapon nira nga sumugot ini nga mga tawo pero nahagos pa hin pira ka adlaw.
Kasumpay hini, naghangyo an opisyal nga deri na unta makig-argumento pa an mga nagpopositibo ha mga otoridad kay para man ini han katalwasan han ira pamilya ngan barangay.
Iginsumat gihapon ni Bernadas nga deri na tutugutan tikang yana nga aadto la ha balay an natutudlok nga mga close contacts han mga natatapnan han kagaw. Iginmando ni Mayor Alfred Romualdez hadin Sabado nga kukuha-on na gihapon ha ira panimalay ngan dadad-on ha Isolation Units an mga close contacts.
Kun aton manunumduman, hadin nag-agi nga mga semana gintutugutan an Home Quarantine han mga close contacts samtang naghuhulat han swab testing result. Hi Bernadas in nagsering nga dako an peligro hini nga deri mahugpoy an pagitapontapon, sanglit bisan close contacts pala, didto na pa-uukyon ha Isolation Centers.
Tungod hini, nagkuha hin kadugangan nga hotel an City Government basi himoon nga Isolation Units tungod han nagtitikadamo nga igka-kwarentina.
Sobra na 500 an nagpositibo ha Tacloban ngan kadam-an na nga barangay an iginpa-ipalarum hin Localized Lockdown ngan Zonal Containment. #
