Isumat.com/10:16AM,May 20, 2020
Naatubang yana hin mga kaso in pira nga mga opisyales han barangay ha Eastern Visayas dara han reklamo nga nagkaada hin “milagro” ha panhatag han cash assistance ha ilarum han Social Amelioration Program (SAP).
An Criminal Investigation and Detection Group(CIDG)-Region 8 an nagbuyagyag nga walo na nga barangay officials an ginsampaan hin kaso kriminal tungod han deri asya nga pamaagi han pagdistribuer han SAP.
An kapitan ha Brgy Jordan ha Villaba, Leyte an ginsampaan hin kaso dara han impormasyon nga nakadangat ha CIDG. Gin-ibanan daw ni Kap hin tag 1 thousand pesos an makakarawat han mga benefeciario.
Didto naman ha Brgy Nati ha Maasin City, tag 1,500 an gin-iban tikang han Singko mil nga Sap. Labot la han kapitan hini nga barangay, ginkasuhan liwat an lima nga kagawad ngan barangay secretary.
Sumala kan Major Duane Ducducan han CIDG, iginpapatapod han kapitan nga basta maghatag la an mga residente han nasabi nga kantidad, segurado hira makaka-agom han SAP. An rason daw ni Kap, iibanan an SAP basi masahid an mga residente makakarawat han ayuda.
An mga kaso nga iginpasaka kontra han mao nga mga opisyal amo an pakasupak han Anti-Graft and Corrupt Practices Act ngan Bayanihan Heal as One Act.
Nagdugang pa hi Ducducan nga ha syudad han Tacloban aada ha imbestigasyon in pira nga opisyal pero naghihikay pa hira hin kadugangan nga mga reklamo basi pag-adman kun kakasuhan liwat ini nga mga opisyal.
An SAP cash assistance in para han mga kablas nga Pilipino nga grabe an epekto ha ira panginabuhi an natatabo yana nga corona virus pandemic. Hi Presidente Duterte in mahugot nga nagmando nga kasuhan ngan papagbatunon ha balaud an hin-o man nga opisyal nga mahilalambigit hin tinuyaw ha panhatag han ayuda pinansyal. # (KEVIN SIOSANA)
