TACLOBAN CITY — Nagpapabilin nga “Unidentified” o waray pangilal-an an patay nga lawas han lalaki nga nahikit-an ha baybayon han Brgy San Roque, Tolosa Leyte.
Subay ha pakighimangraw han isumat.com kan PInsp Emy Maceda, Hepe han Tolosa PNP, nga waray pa kaparyente sangkay an nakadto ha ira buhatan agud nga maidentify an biktima.
Sumala kan Maceda nga ira na gin “Flash Alarm” ha iba nga istasyon han Kapulisan agud nga dayun na nga makilala an biktima.
Ha pagkayana in nakatalaan naman ini nga iglubong ha Pampubliko nga sementeryo han mao nga lugar mahitungod nga sobra na nga 24 oras an pagpabilin han mao nga patay nga lawas ha ira buhatan.
Nabaruan nga ginbabana-bana nga ada ha 30-40 anyos an pangidaron han biktima, 5’4″ an kahitas-on, may tattoo nga nakasurat nga ‘CB’ ngan DRAGON samtang ha tu-o nga sugbong in mayda tattoo nga triangulo nga may nakasurat nga ‘MARK NR NGAN NESER’ ha sulod hini.
Basar ha autopsy result nga pagkalumos an hinungdan han pagkamatay han biktima.
Labot pa hini mayda ini binalbagan ha wala nga parte han iya Ulo.
