Isumat.com/9:03AM, Pebrero 8, 2021
Gin-aresto han mga otoridad ha Calbayog City in usa nga nagpakilala nga lider hin relihiyoso nga hugpo tungod han reklamo nga nagingikil o nagdedelihensya hin kwarta tikang han mga aplikante pagka-pulis.
Sumala han report han PNP Regional Office, ginkilala an suspetsado nga hi Paulo Mendoza, 36 anyos, ngan residente han Midsayap, Zamboanga del Sur. Hi Mendoza in nagpakilala nga “pastor” hin sekta. Iginreklamo hiya hin duha nga complainants tungod han iya pag-aro hin 20 Mil pesos basi mapasilitar an ira pakasulod ha PNP.
Ini nga panhitabo in iginkatuman han pagbisita ni PNP Chief General Debold Sinas ha Calbayog hadin Biernes. Sumala han duha nga tagreklamo, gin-aro-an hira ni Mendoza hin tag 20 Mil kay hiya na daw an mag-aareglar han proseso labi na nga nakadto ha Calbayog hadto nga takna hi Sinas.
An kapulisan in naghimo hin entrapment operation ha Bay Park Hotel ha Calbayog kun diin nakwelyuhan hi Mendoza. Gin-iimbestigar gihapon han mga otoridad an kaupdanan ni Mendoza nga posible lakip han sindikato kay nakasul-ot hira hin jacket nga mayda logo han Malakanyang.
Kasumpay hini, nagsering hi Sinas nga an proseso han recuitment han PNP in deri kinahanglan nga magastos pa an aplikante kay ini in serbisyo publiko. Iya ginsagdunan an intresado pagsulod ha PNP nga deri magpahugay hin sugad hini nga pangowat. #
