Nagtikakusog an panawagan ngan mga pitad han magkalain-lain nga sektor ha Eastern Samar kontra han nahisumat nga may maabot nga barko ha Homonhon Island kun diin sakay in mga Tsino.
Nagbuburublig yana an lokal nga pangobyernuhan han Guiuan, an Provincial Government han Eastern Samar ug an Singbahan Katoliko basi kabalabgan an nahisumat nga pagdu-ong hin usa nga cargo ship ha isla han Homonhon.
Hi Gobernador Ben Evardone in nagsumat nga nakigsumpayan na hiya ha natutungdan nga mga ahensya han gobyerno nga deri tugutan nga makadung-go an barko ha Homonhon. Nagsering an amay han probinsya nga iya na gin-alerto an Philippine National Police, Philippine Coast Guard ngan Department of Health para maghimo hin aksyon kay kinahanglan mapanalipdan kontra hin bisan ano nga hulga ha panlawas an mga tawo han lalawigan.
Kakulop, hi Guiuan Mayor Analiz Gonzales-Kwan in nagmando han PNP ngan Coast Guard nga balabgan an nasabi nga plano han nagdudumara han cargo vessel nga dumu-ong ha Homonhon. Ini nga isla nga mayda walo nga barangay, in sakop han munsipalidad han Guiuan.
Naha-una hini, an Parokya han St John the Baptist ha Homonhon an nagpagawas hin mahugot nga pagbalabag hini nga aktibidad. Nakadangat man gud ha ira an impormasyon nga usa nga cargo vessel kun diin damo an tripulante nga mga Tsino in magkakarga hin produkto hin mina dida han nasabi nga isla.
Ini nga impormasyon in pira na ka adlaw nga nagdudurot hin pagkabaraka han mga residente han mao nga lugar dara han gin-aatubang yana nga COVID-19 pandemic kun diin gintotoohan nga nagtikang an makamaratay nga kagaw ha Tsina.
Hira Evardone ngan Kwan upod an Singbahan in nagkaka-urusa han ira tindog nga deri angay padu-ongon ini nga barko samtang naatubang pa an katawhan han corona virus nga krisis. #
(Posted 10:57 AM, April 6, 2020)
