Isumat.com/7:20AM, Enero 23, 2021
24 oras la an humagos tikang han pagpataya hin usa nga lalaki ha Calbayog City ngan mayda na liwat ginpikahan nga bag-o nga biktima didto han nasabi nga syudad.
Kakulop, Enero 22, pasado alas 7 han aga, an biktima nga hi Michael Derio in pinusil hin tulo nga suspetsado ha Brgy Rizal Calbayog. An 30 anyos nga biktima in nalingkod ha iya motorsiklo ha ligid han kalsada hadto nga takna.
Mayda umabot nga kolor grey nga van ngan humaw-as in tulo nga armado nga suspetsado ngan ginratratan dayon hi Derio nga naigo ha magkalaainlain nga parte han iya lawas. Dead on the spot an ulitawo nga biktima ngan kadagmitan nagpaharurot an sarakyan han mga suspetsado.
Tobtob yana, padayon an imbestigasyon han panhitabo.
Usa ka adlaw antis hini, hi Harry Rumohr in namatay ha sulod han iya sarakyan han pusilon hin duha nga suspetsado harani han talipapa ha Brgy San Policarpo. Waray gihapon makilal-i an mga suspetsado.
Hi Derio an ikalima nga nahireport ha pulis nga pinatay ha Calbayog yana nga Enero. Ngatanan han mga biktima kalalakin-an. #
