Isumat.com/5:23AM, Pebrero 6, 2021
Pito na nga munisipalidad ha probinsya han Leyte an nadistroso an industriya han baboy tungod han pagsarang han African Swine Flu.
Kakulop, Pebrero 5, iginpasamwak han Department of Agriculture nga nahidugang an Palo ngan MacArthur ha mga bungto kun diin may nagkatatapnan nga mga baboy.
Mayda namatay nga baboy ha Brgy Baras, Palo, samtang an insidente ha MacArthur in didto naman ha Brgy Liwayliway. Dida han eksaminasyon ha laboratoryo, ASF an rason han pagkasasakit ngan kamatay han mga baboy didto hini nga mga lugar.
Iginreport gihapon kakulop han DA an kumpirmado nga kaso han ASF ha Brgy Bislig, Tanauan, Leyte. Hinungdan hini, umabot na ha pito nga bungto han probinsya an nadarahigan han virus. Naha-una an kumpirmado nga nagkatatapnan an baboy ha Abuyog, La Paz, Javier ngan Dulag.
Ginkakabarak-an nga magtitikadamo an ma-aalakbatan hini nga sakit han baboy sanglit mahugot yana an mga pitad han tagsa-tagsa nga LGU ha Eastern Visayas basi deri makasulod ha ira lugar an mao nga virus. #
