Nagkakagawas gud man yana it mga ideya ngan mga estratehiya basi kabalabgan an pagsarang pa han makamaratay nga COVID-19…ug nakahunahuna an pamunuan han Philippine National Police hin usa nga paagi nga dako an mabubulig para hini nga panuyu-anan.
Dida hin usa nga direktiba nga iginpagawas han PNP General Headquarters pinaagi kan Major General Emmanuel Licup, Director for PNP Operations, iginmamando ha ngatanan nga kaapi han pwersa han pulisya nga maghimo hin diary kada adlaw basi maka-ayuda ini pananglitan in usa nga PNP member matapnan han virus.
Magagamit man gud ini dida han contact tracing o pagbiling han mga tawo nga iginka-upod-upod o iginka-istorya han pulis ug an mga lugar nga iya ginkadtu-an ha kada adlaw. Sumala pa han kamanduan, an kapulisan in kaapi han frontliners ug an ira trabaho in pirmi aada an hitaas nga kadelikaduhan nga matapnan han kagaw.
Iginpapasurat dida han diary an petsa ngan oras, persons in close contact, an lugar ug an mga aktibidadis ha kada adlaw nga pagtuman han ira serbisyo.
Iginpahayag han PNP Health Service nga tobtob dida han Marso 28, 2020, tulo na nga kapulisan an nag positibo han virus, ngan haros usa ka gatos an ginkonsiderar nga Persons Under Investigation (PUI) ngan damo an Persons Under Monitoring (PUM).
Pinaagi hini nga diary, makakabulig ini basi mabantayan ngan kadagmitan matagan han kaangayan nga aksyon an mga nga tawo nga iginka-contact han mga PNP personnel pananglitan magin positibo han virus an nasabi nga miembro han tropa. Hinsabutan nga yana nga mga panahon, ginkukuri-an an gobyerno han contact tracing han mga COVID 19 positive, sanglit naghimo hin sugad hini nga inisyatibo an PNP. #
(Posted 2:47 PM, March 30, 2020)
