Isumat.com/Hulyo 13, 2021
Deri tutugutan han gobyerno probinsyal han Northern Samar an bisan hin-o nga mag-aabusar o matalapas han mga patakaran kasumpay han pagpahi-agom han Covid Vaccines ngadto han katawhan.
Ini an iginpatapod ni Northern Samar Governor Edwin Ongchuan dungan han iya pagpirma han Executive Order No. 01-06-21 nga nagtutukod han Provincial Health Office Investigating Committee nga manginginano han gin-aalegar nga deri otorisado nga pagdara hin bakuna tikang ha Provincial Hospital ngadto hin pribado nga lugar ha Catarman.
Kun manunumduman, iginbuyagyag hin usa nga miembro han Sangguniang Panlalawigan nga may natabo nga pagbalhin hin 15 ka doses hin Sinovac Vaccine tikang han hospital ngadto hin balay hin gintutudlok nga poderoso ngan dako an impluwensya nga indibiduwal dida han probinsya.
Dida han impormasyon, hadton Hunyo 8, mayda natabo nga panmakuna ngan 50 katawo an naka-eskedyul nga matuturukan. 35 la katawo an umulpot, sanglit an salin nga 15 doses in iginbalik ngadto han storage area han hospital. Pagkakulop, igin-alegar nga mayda babaye nga gumawas tikang han storage area bitbit an kahon nga may sulod han 15 doses han bakuna.
Sumala pa han alegasyon, gindara ini ngadto hin pribado nga balay ngan nabakunahan an mga tauhan han nasabi nga indibiduwal.
Pinaagi han pagtukod han Investigating Committee, nagsering hi Ongchuan nga klaro ini nga pagparig-on nga komitido an iya liderato basi maseguro an integridad, tangkod ngan pagigin propesyunal han mga opisyal ngan empleyado.
Iginsaad han opisyal nga waray kikilingan an ira imbestigasyon basi gumawas an kamatuoran hini nga insidente.
Iginkalipay gihapon han gobernador an mando han Department of Justice nga bumulig an NBI ha pag-imbestigar. Sering pa niya, ira igrerespeto kun ano man an gagawsan han imbestigasyon ngan magsusunod kun ano man an igintakda han balaud.
Ha atubangan hini nga kontrobersiya, nagpasarig naman hi Ongchuan nga magpapadayon an panbakuna ngan iya gin-awhag an mga Nortehanon nga suportaran ini nga pitad han gobyerno basi makabalik na ha normal an kinabuhi han katawhan. #
