Isumat.com/10:02AM, Abril 14, 2021
An natabo nga pagpabuto hin explosive device in dako nga insulto ha mahimyang nga munisipalidad han Tanauan, pahayag ni Mayor Pel Tecson.
Dida han pakighimangraw han iFM-RMN Tacloban, nagsering hi Tecson nga duro na kama-iha nga panahon nga mamurayaw an Tanauan bisan pa man mayda pinili-ay o waray election, sanglit an natabo in sugadsugad hin deri kanan tawo nga binuhatan.
Sumala han alkalde, an sugad hini nga bayolente nga binuhatan in waray lugar ha sibilisado nga sosyedad, sanglit mahugot an pagkondenar han mga residente hini nga binuhatan.
Pasado alas 6 han gab-i hadin Abril 12, an panimalay ni Mildred Lopez, namumutang 200 metros tikang ha munsipyo in nadistroso han paglabayon ini hin “imporovised” nga bomba. Nagsering hi Tecson nga duro hin kamakusog an buto kay nabati-an pa ini ha distansyado nga mga lugar.
Waray nahireport nga nagkaada hin injury pero nadistroso an pira nga parte han balay ni Lopez sugad man an balay han iya amyaw. Ini in nagdurot hin dako nga trauma ngan kahadlok ngadto kan Lopez ug sapit nga kabablayan. Nagsumat hi Tecson nga syahan pala ini nga panhitabo ha kasaysayan han Tanauan.
Hinungdan hini, an konseho han bungto in kadagmitan nag-aprobar hin pondo nga 500 Mil pesos nga premyo para han hin-o man nga makakagsumat o makakahatag hin impormasyon basi matudlok an nagpapaluyo han insidente.
Dida han pahayag han alkalde, sugad-sugad nga may anggulo hin pulitika an iya pamulong kay nagsering hiya nga kun hin-o man an may “ambisyon,” unta deri parehas hini nga bayolente nga pamaagi.
Subay han mga surok han Isumat.com, hi Mildred in mahugot nga tagsuporta ni Tecson. Dugang pa niya, mayda na gintutumbok nga lead an mga imbestigador ha pagkilala han puede magbuhat hini ug an may kapasidad nga himoon ini.
Ha pag-obserbar han kadam-an, bisan kun sobra pa usa ka tuig antis an eleksyon, nakaladkad na yana an sitwasyon han pulitika ha Tanauan. Hi Mayor Pel in aada ha iya ikatulo ngan katapusan nga termino, ug an iya ginang-maybahay an makandidato han nasabi nga pwesto.
Makusog naman an mga notisya nga an igkaka-engkwentro ni Mrs Tecson amo hi Gina Merilo nga nagseserbe han ikatulo ngan pinal nga termino komo board member han 1st District han Leyte. #
