Dara gud man nga an COVID-19 in bag-o nga klase hin kagaw, waray pa nadidiskubre nga bakuna o medisina nga makakamatay hini nga kagaw, sanglit damo la an mga paagi o diskarte han katawhan nga ha ira pagtoo in makakasupil han virus.
Usa na hini an hot steam o pagpa-aso kun diin an usa nga tawo amo in maglalaso hin tubig ngan ha pagkaladkad hini, igtutungod an nawong dida han kaserola o surudlan han linaso ngan paghihisnukon an aso nga nagpaparaso ha pagtoo nga mamamatay an kagaw nga nakasulod na ha lawas han tawo. Mayda pa ngani mga suhestyon nga butangan hin asin ngan luy-a an tubig nga papakaladkaron.
Pero sumala han Department of Health-Region 8, an pagpa-aso o paghisnok han nagpaparaso nga alisngaw tikang han linaso in deri epektibo ngan deri mamamatay an virus kun nakasulod na ini ha lawas han tawo. Dida han programa nga “DOH Talk On Air” ha PRtv Tacloban kanina han aga, Abril 13, 2020, nagsering hi DOH-8 spokesperson John Paul Roca nga deri tinood nga namamatay an virus nga nakasulod ha lawas han tawo pinaagi han pagpa-aso.
Sumala kan Roca, an pagpa-aso ngan bisan an pag-inom hin mapaso nga tubig in deri makakamatay han kagaw kun nakasulod na ini ha lawas han tawo. An ginbubuhat han DOH amo an paghatag hin supportive therapy sugad han mga medesina nga magpapakusog han immune system han pasyente ngan deri na magtikagrabe an infection.
Pero ginklaro ni Roca nga posible lugod mamatay o deri mag-iha an kinabuhi han virus kun hilawig an oras nga masisirakan ini han adlaw o mayda exposure hin mapaso nga butang kun an virus in waray pa makakasulod ha lawas han tawo.
Kun aton liwat manunumduman, bisan an World Health Organization in waray gihapon pagpagawas hin mga pahayag nga nakakamatay han corona virus an hot steam. #
(Posted 2:47 PM, April 13, 2020)
