Isumat.com/7:39AM, Marso 25, 2021
May posibilidad nga matatapos han NBI yana nga bulan han Marso an imbestigasyon han pagkamatay ni Calbayog City Mayor Ronaldo Aquino.
Ha usa nga press conference kakulop, Marso 24, hi Samar 1st District Congressman Edgar Mary Sarmiento an nagsumat nga subay han iya impormasyon tikang ha NBI, ginmamalahimo han ahensya nga makaghatag hira hin resulta han imbestigasyon yana nga bulan.
Pero ginklaro ni Sarmiento nga deri liwat ini segurado kay bangin mayda pa importante nga mga detalye han imbestigasyon nga deri pa areglado ngan deri gihapon puede nga magin apurado an proseso. Ha takna nga matapos na an imbestigasyon, amo na an pagsampa han kaangayan nga mga kaso kontra han nagpapaluyo han krimen.
Kadungan hini, iginbuyagyag han magbabalaud nga nahi-ugsod an imbestigasyon ha kongreso hini nga insidente kay naghangyo an NBI nga tapuson anay nira an ira pagsusi. Amo gihapon ini an rason kun kay-ano nga waray pa gihapon magtikang an lain nga imbestigasyon han senado, sering pa ni Sarmiento.
Nagpasamwak gihapon hi Sarmiento nga magpapabilin an mga elemento han Philippine Army paghatag hin seguridad ha pamilya Aquino ug ha Calbayog City. Ira ini ginhangyo ha Defense Department ngan Philippine Army nga tagan hira hin seguridad.
Ginklaro ni Sarmiento nga deri mabaya an Philippine Army paghatag hin seguridad samtang deri pa nahibabalik an pagtapod han pamilya Aquino ngan mga Calbayognon ha Philippine National Police.
Pira nga mga opisyales ngan tauhan han PNP an gintutudlok nga posible may kalabutan han insidente. An PNP Region 8 in may kalugaringon nga Task Group nga naghihimo gihapon hin imbestigasyon han panhitabo.
An patay nga lawas ni Mayor Aquino in iginlubong kakulop didto ha Calbayog kun diin gintambungan ngan ginsaksihan ini hin porlomenos kuatro mil nga katawhan. #
