Isumat.com/Hunyo 21, 2023
An pag-export hin mga produkto agrikultura ngadto ha iba nga nasud an paniningkamutan han lokal nga pang-gobyernuhan han Borongan City, Eastern Samar.
Ha pakighimangraw ha mga kaapi han media kakulop, Hunyo 20, 2023, hi Borongan City Mayor Jose Ivan Dayan Agda in nagsumat nga ginhihimo han iya pamunuan an ngatanan nga pamaagi ngan estratihiya basi lumangbo an agricultural industry dida han syudad.
Pinaagi hini, makakagproduser hin hamurasak nga ani tikang ha mga umhanan ngan pangisda ug ini an magigin dalan nga makagpadara hin mga produkto ngadto ha iba nga nasud.
Pero ginklaro ni Agda nga antis ini matabo, kinahanglan maseguro nga an ngatanan nga Boronganon in makatagamtam hin pag-uswag ha kinabuhi. Sumala han alkalde, dapat makab-utan an tinatawag nga economic inclusivity kun diin aabaton ngan maa-aguman han tanan nga Boronganon an pagdukwag han ekonomiya han syudad.
An food security o bastante nga suplay hin pagkaon an gintututukan gihapon yana han iya liderato basi magmenos an presyo han papliton dida han syudad.
Dida han pag-abri han bag-o nga Departure Terminal Building han Borongan Airport hadton Hunyo Hunyo 21, 2023, gintudlok ni Agda an nasud Japan nga posible magin export partner han Borongan City ha takna nga mayda na kapas an syudad pagpadara hin mga produkto ha iba nga nasud.
Dida han mao nga okasyon, hi Japanese General Consul Hideki Yamaji an usa han dumagko nga mga bisita. Hi Yamaji in umuyon han pahayag ni Agda han posible nga export partnership han Borongan City ngan Japan.
Igindig-on ni Agda nga kinahanglan an kooperasyon han ngatanan basi pagpulsan an agrikultura ug an mga produkto nga makukuha tikang hini nga industriya.
Yana nga Hunyo, gintitigamnan han Borongan an ika-16 nga anibersaryo han pagigin syudad. Kadam-an nga mga aktibidadis an iginhan-ay han LGU basi magin mahinungdanon an selebrasyon.
Han paki-anhan hi Agda kun natuman na ba an mga inop han mga Boronganon tikang mahimo nga syudad an lugar, iya igin-esplikar nga deri pa ini hul-os nga natutuman, pero waray hunong an mga opisyales han LGU ug an magkalainlain nga ahensya ha panlimbasog para han kauswagan nga amo an sentro nga panuyo kun kay-ano ginhimo nga syudad an Borongan. #
