Naghahangyo ha publiko an Eastern Visayas Regional Medical Center Blood Bank nga magpadayon paghatag o pag-donar hin dugo kay duro ini ka-importante ha pagtambal hin mga pasyente hin magkalain-lain nga sakit ngan mga emergency cases.
Dara gud man han krisis nga durot han COVID-19, dako hin duro an pag-iban han mga blood donations ha EVRMC ngan ini nga sitwasyon in posible magdurot hin pagkulang hin dugo nga gagamiton ha mga pasyente nga magkikinahanglan hin blood transfusion.
Iginsumat ni Roland Gorgonia, an Supervisor han EVRMC Blood Bank, nagkukulang hin supply hin dugo hapagkayana ngan deri ini maupay nga kahimtang. Sumala pa kan Gorgonia, na-kanselar ngan waray na naghihimo yana hin blood donation activities kay waray man mga klase ha eskwelahan ug an mga grupo nga nagdudumara hini nga mga pitad in temporaryo nga waray magpadayon han ira mga programa.
An mga pribado nga indibiduwal nga karuyag magdonar hin dugo in deri liwat nakakakadto ha EVRMC dara han kwarentina.
An EVRMC in nagkikinahanglan hin 20 tobtob 30 ka units hin dugo kada adlaw, pero dara han sitwasyon yana, naabot nala hin 3 units kada adlaw an nakokolekta han blood bank. Ini nga kahimtang in deri maupay kay kukulangon gud hin blood supply an Tacloban, pahayag pa ni Gorgonia.
Ginklaro ni Gorgonia nga deri nasasakop o exempted han mga quarantine guidelines an pagkatitirok basta kanan blood donation an aktibidad, sanglit puede maghimo hin mga proyekto kasumpay hini nga panuyu-anan.
An EVRMC Blood Bank in nag-aaghat para han mga intresado pagdonar hin dugo nga makigsumpayan ha ira pinaagi hini nga mga contact numbers: 09369143123 ngan 09365203920. Yana nga panahon han COVID-19 nga krisis, mga bayani gihapon an mga tawo nga maghahatag hin dugo. #
(Posted 9:07 AM, April 13, 2020)
