Umabot na hin 15 million iton baraydan hiton oriental hotel ha provincial government hiton Leyte kumo plite han lote nga guin uukopahan han mao nga hotel nga guin tatag-iyahan han probinsiya ha Pawing Palo, Leyte.
An mao nga kantidad in kaparte la han maabot 70 million nga mga ka plitehan nga waray ma kokolekta han probinsiya.
Ini in subay han audit report han Commission on Audit (COA) han mga transaction han kapitolyo ha tuig 2018.
Sumala han mao nga audit report nga nakag bayad la an oriental hotel tikang han Agosto 2000 tubtub han Marso 2010 ngan waray na ini makabayad han plite tikang han April 2010 ngadto ha Oktubre 2013 san-o matabo an typhoon Yolanda.
Waray liwat sumukot an probinsiya hin plite tikang han November 2013 ngadto han October 2016 mahitungod kay waray man operation an mao nga hotel mahitungod han naguin destroso ha mga pasilidadis hini mahitungod han bagyo Yolanda.
Nag tikang liwat panukot an probinsiya hin plite hadton Oktubre 2016 han bumalik an operation han hotel.
An LKY property holdings nga amo an nag tatag-iya han Oriental Hotel ngan han probinsiya in nag kaada hin “Compromise Agreement” nga nag resulta han pag ha bubo han ira babayaran nga umabot nala hin 11 Million para han mga kabaraydan hini tikang han Agosto 2009 ngadto han Oktubre 2013 ngan Nobiembre 2016 tubtub ha Septiembre 2017.
An 11 Million in babayaran ha sakub hin lima ka tuig tikang octubre 31, 2017 ngadto ha Septyembre 31, 2022 pinaagi hin “equal monthly installment” nga Sistema.
An Oriental hotel in mayda 35 anyos nga kontrata ha probinsiya han Leyte nga nagtikang hadton Agosto 2009 tubtub ha Agosto 2044.
