Isumat.com/7:54AM, Marso 19, 2021
Waray papeles o dokumento nga nakit-an hi Samar PNP Provincial Director Col Glenn Cinco nga magkakamay-ada hin aktibidad an PNP Integrity Monitoring and Enforcement Group (IMEG) ug an Provincial Drug Enforcement Unit (PDEU) hadton Marso 8 ha Calbayog City kun diin namatay hi Mayor Ronaldo Aquino ngan lima pa nga iba.
Ini an nagin pahayag ni Samar Board Member Julius Mancol katapos han sesyon han Sangguniang Panlalawigan kun diin ira ginpa-atender ngan ginpaki-anhan hi Cinco mahitungod han panhitabo ha Calbayog.
Naghimo hin video interview an The Calbayog Journal kan Mancol, ngan dida hini nga interview, iginbuyagyag ni Mancol nga dida han sesyon, nagsumat hi Cinco nga waray niya nakita nga papeles han operasyon han IMEG ngan PDEU ha Calbayog. Nagsering gihapon hi Cinco nga waray niya salabutan nga mayda sugad hini nga operasyon.
Kun manunumduman, iginpahayag han PNP Regional Office nga an mga opisyal ngan tauhan han IMEG ngan PDEU in nagdudumara hin “Red Teaming Operation” didto han lugar hadto nga petsa. Karuyagsidngon han Red Teaming – naghihimo hin aktibidad an PNP basi pruybahan kun andam ba an mga kapulisan didto han lugar ha mga pag-atake han mga kaaway han gobyerno.
Dida gihapon han mao nga sesyon, iginsaysay ni Cinco nga deri hiya maaram han rason kun kay-ano nga sugad-sugad hin nagkaka-impati an report han Calbayog PNP ug han PNP Regional Office mahitungod han panhitabo. Dida han Calbayog PNP Spot Report, nagawas nga an syahan nga nagpabuto amo an grupo han mga suspetsado. Pero han pahayag tikang ha Regional Office, naha-una panmusil an kampo ni Aquino sanglit bumulos an IMEG ngan PDEU.
Dida gihapon han sesyon, nagpaki-ana hi Board member Mancol kun kay-ano nga ginlaknit ha pwesto an Chief of Police han Calbayog. An baton ni Col Cinco, “Command Responsibility” daw an rason. Sumala kan Mancol, deri ini matadong kay waray man gihapon koordinasyon ha Calbayog PNP an operasyon han IMEG ngan PDEU.
Kun amo ini nga “command responsibility” an papatamakan han paglukba ha pwesto, kinahanglan sikaran gihapon ha posisyon an nagdudumara han PNP Samar Provincial Office. Nagsering hi Cinco nga an Regional Office daw an nagdesisyon hini ngan deri ha iya poder.
Hi Col Cinco in nag-asoy gihapon dida han sesyon nga hi Mayor Aquino in deri lakip han Samar PNP List han mga personalidad nga nalalambigit ha iligal nga droga, pahayag pa ni Mancol.
Kadungan hini, ginngaranan na han PNP Regional Office an pira nga higtaas nga opisyal nga gintudlok han mga testigos nga nadadabi ngan nakadto han lugar han krimen. Amo ini hira Col Harry Sucayre, Maj Cyril Tan, Capt Julius Armesa ngan Cpl Edcil Omega. Hira in aada ha kustudiya han tagsatagsa nira nga units. #
