Isumat.com/Setyembre 19, 2023
Tungod han isyu kasumpay han pasamwak han Diocese of Borongan pagdimis kan Fr Pio Aclon komo padi, lumutaw an posibilidad nga maghimo hin legal nga aksyon hi Aclon kontra han Obispo han Diocese.
Kakulop, Setyembre 18, an Madula Law Firm nga nakabase ha Metro Manila, in nagpadara hin surat ngadto kan Crispin Varquez, an Obispo han Diocese of Borongan. Ini nga surat in tinatawag nga “Demand for Production of Pio C. Aclon’s Vatican Case Record.”
Hi Aclon in kliyente han nasabi nga Law Firm. Kun manunumduman, hadton Setyembre 17, 2023, igin-anunsyo ha mga singbahan ha Eastern Samar ngan igin-post ha Facebook an Informationis Causa nga nagpapasabot nga gin-dismiss ni Santo Papa hi Aclon ha iya pagkapadi, ngan ginpatamakan an reklamo kontra ha iya nga “sexual abuse committed involving minors.”
Kasumpay hini, mahugot nga gin-aaro han abogado ni Aclon nga igpresentar ni Varquez an mga dokumento tikang ha Vatican City ha Roma kun diin nahipapatik an desisyon ni Pope Francis ug an ginbasaran han desisyon, kun mayda man.
Gin-aaro gihapon han kampo ni Aclon an bug-os nga record han reklamo nga ginbasaran han desisyon pagtanggal kan Aclon.
Sering pa han Madula Law Firm, ira gintatagan hin pito ka adlaw tikang makarawat an Demand Letter para han Obispo nga igpakita an nasabi nga mga dokumento.
Kun deri makagpakita hin madig-on nga rason an Obispo basi deri mapresentar ini nga mga dokumento, karuyagsidngon hini nga gintoyo ngan talapas ha balaud an pagbaribad han Obispo.
Kun amo ini an matabo, mapupugos an ira kliyente nga hi Aclon nga maghimo han kaangayan nga legal nga aksyon kontra kan Varquez.
Igindidig-on ni Aclon nga gintalapas an iya Canonical ngan Civil Rights han pitad nga ginhimo han Diocese.
Tobtob han ginsusurat ini nga notisya, waray pa kasasabti kun nakarawat na han opisina han Obispo an nasabi nga “Demand Letter.”#
