Isumat.com/Hunyo 14, 2021
An rebelde nga kumunista New Peoples Army ba an nagpapaluyo han brutal nga pagpatay kan Rolando Delorino, anay presidente han University of Eastern Philippines ha Northern Samar?
Ini an anggulo nga gin-iimbestigar yana han mga otoridad katapos la igbuyagyag han nadakop nga suspetsado han krimen nga ginsugo hiya han NPA pinaagi hin usa nga Ka Fely nga patayon hi Delorino.
An 64-anyos nga biktima in namatay tungod hin mga buno ha iya lawas han pagsudlon han suspetsado an iya panimalay ha Brgy Dalakit, Catarman hadton Sabado han gab-i. Nadara pa an biktima ha Northern Samar Provincial Hospital pero pakyas nga masalbar an iya kinabuhi.
Syahan gumawas an mga reports nga posible panikas o robbery an rason han mga suspetsado han pagsulod ngadto han balay ni Delorino nga nagin hinungdan han kamatay han anay opisyal han UEP.’
Dida han imbestigasyon, nakit-an an suspetsado ha CCTV footage nga amo an nagin dalan basi hiya ma-aresto ha Brgy Cag-abaca han mao nga bungto.
Nagsering an Northern Samar PNP nga subay han CCTV, Sabado han kulop nakit-an an suspetsado nga nagliliyong-liyong harani han balay ni Delorino. Temprano han gab-i, sumulod ngadto han balay ngan pagka alas 9 gumawas an suspetsado. Han harani na an katutnga han gab-i, bumalik na liwat an suspetsado ngan gumawas utro banda alas 5 han maagahon han Domingo.
Dida han kadakop ha iya, amo la gihapon an sul-ot nga tshirt ngan shortpants han suspetsado. Nakuha gihapon an kutsilyo nga gingamit han pagpatay.
Nagsumat hi Plandez nga ginsugo hiya han walhon nga grupo ngan gintarhog nga mayda matatabo nga maraot ha iya pamilya kun deri niya mabuhat an mando ha iya.
Hinsabutan gihapon nga hi Plandez in na-aresto na dida han Pebrero tungod hin kaso nga attempted murder. Nakagawas ha karsel hi Plandez hadin Abril 14 han makagpiyansa hiya han nasabi nga kaso. Igin-aalegar nga an suspetsado in kaapi hin robbery-extortion nga sindikato.
An mga kapulisan in nag-iimbestigar kun ano an posible nga motibo han NPA kun tinood gud man nga hira an nagsugo nga patayon hi Delorino. Ira gihapon ginpapanginano kun mayda Ka Fely nga kaapi han NPA didto han nasabi nga lalawigan.
An biktima in nagin presidente han UEP tikang Agosto 2015 tobtob Agosto 2019. #
