Isumat.com/Pebrero 10, 2022
An mga komunista nga NPA terrorists an nakamatay han duha nga menor de edad ngan pakasamad hin usa pa nga sibilyan dida han ambush nga ginhimo han mga rebelde kontra han militar hadton Pebrero 8, 2022 ha Brgy Roxas, Catubig, Northern Samar.
Sumala han pahayag han 8th Infantry Division Philippine Army, an mga kasundalohan in nakakarawat hin impormasyon nga may mga rebelde didto han nasabi nga lugar. Tungod hini, nagpatrolya an mga tropa han army tikadto han lugar ngan ira iginkatapo an mga sibilyan didto han kalubi-an.
Ginsagdunan han kasundaluhan an mga sibilyan nga didto la hira han luyo han mga tropa kay delikado kun mayda mga rebelde ha unhan. Waray pagsayop an pagbanabana han militar kay samtang nag-iiristorya pa hira ug han mga sibilyan, ginpaarakan hira hin bala han nakaposisyon nga mga rebelde ha hiruhitaas nga lugar.
An mga sundalo in nagkahapa dayon, pero an mga sibilyan ha ira luyo in nandadlagan. Sering pa han militar, waray pag-alang pagpabuto an mga rebelde bisan may mga sibilyan dida han lugar han pag-agwayan.
Duha nga kabataan nag-eedad hin 12 ngan 13 anyos an nagka-iigo hin bala tikang han mga armas han NPA, samtang usa naman nga 26 anyos nga sibilyan an nasamad.
An usa nga bata in namatay dida han lugar, samtang an usa naman in naawat an kinabuhi samtang gintatambal ha hospital.
Subay pa han report, an 13 anyos nga bata in nakahimo pa hin pagsaysay han panhitabo antis hiya mamatay ha hospital. Iya ginsumatan an mga opisyal han barangay nga an naka-igo ha ira amo an mga bala tikang han NPA.
Ini nga pag-asoy han bata in parehas gihapon han iginsumat han 26 anyos nga nasamad. Sumala hini nga lalaki, dumalagan hira han magpabuto an mga rebelde ngan naigo hira.
An mga mga rebelde in dayon nanngalagiw katapos nira magpa-arak hin bala. Ha luyo nga bahin, an militar in nanginano han kabutangan han mga sibilyan ngan waray na maglanat han mga rebelde tungod han makuri nga kahimtang han nagka-iigo nga sibilyan.
Ha bulig han mga opisyal han barangay ngan LGU, nadara ha hospital an mga biktima.
Sumala kan MajGen Edgardo de Leon, Commander han 8th ID, ginbaliwaray han mga kumunista nga rebelde an kinabuhi han mga sibilyan kay bisan kun klaro nga mayda mga sibilyan gintarget lugod hira han mga rebelde.
Nagsering pa an heneral nga an mga dereksyon han bala in magpapamatood nga tikang han mga rebelde an mga punglo nga nakaigo han mga sibilyan.
Dida han pahayag han Philippine Army, ginkondenar han Provincial Government han Northern Samar ug han LGU-Catubig ini nga deri makatawo nga binuhatan han NPA. Tungod hini, an natutungdan nga mga LGU in nagsaad nga magsasampa han kaangayan nga mga kaso kontra han nagpapaluyo han pangatake ngan mag-aaro gihapon han kaangayan nga kabaraydan han danyos ha kinabuhi tikang ha National Democratic Front nga amo an nagtataglawas han NPA ha mga negosasyon ha gobyerno, pahayag pa han 8th Infantry Division. #
