Isumat.com/Hunyo 11, 2021
Kumpiyansa an National Bureau of Investigation (NBI) nga madig-on an ira iginsampa nga Murder Complaint ha Department of Justice kontra hin mga opisyal han Philippine National Police kasumpay han kamatay ni anay Calbayog City Mayor Ronaldo Aquino.
Kakulop han kulop (Hunyo 10), an NBI an nag-transmit han reklamo upod na an sapin-sapin nga mga dokumento komo ebedensya ngadto ha National Prosecutions Service han DOJ.
Pahayag han NBI nga an reklamo in ira iginpatamak ha testemonya hin 53 nga testigos, mga CCTV ngan video footage, ballistic examinations ngan iba pa nga proseso.
An mga ginsalawdan han reklamo amo hira Lt Col Harry Villar Sucayre, Major Shyrile Co Tan, Capt Dino Laurente Goles, Lt Julio Armeza Jr, Sgt Neil Cebu, Sgt Edsel Tan Omega, Police Officer Nino Salem ngan upat nga John Does.
Ginklaro pa han NBI nga nagpapadayon an imbestigasyon basi matudlok an motibo han pagpatay, pero na-establisar nira nga ginplanuhan an aktibidad nga pagpatay sanglit murder an ira iginpasaka ha DOJ.
An DOJ an magtitirutimbang han mga ebedensya sugad man an depensa han mga akusado kun angay ba ini igsampa ha korte.
Antis pa hini, an PNP in nagsampa hin kaso nga homicide ngan frustrated homicide kontra han nasabi nga PNP officials.
Ginpasakaan gihapon han PNP hin reklamo nga murder hi Mark Aquino ngan usa nga police escort ha alegasyon nga an anak han alkalde an nagpusil ngan nakamatay kanda Major Tabada ngan Sgt Laoyon.
Nahitabo an madugo nga insidente ha Calbayog City hadton Marso 8, 2021 kun diin binawi-an hin kinabuhi hi Aquino ngan duha han iya bodyguards sugad man hira Tabada ngan Laoyon.
Igindig-on han NBI nga ambush an natabo kay subay han ira imbestigasyon, pira ka bulan nga ginplanuhan ini han grupo nira Tabada.
An senado in nagtikang na han ira kalugaringon nga imbestigasyon hini nga panhitabo.
Naglalaum naman hi Mark Aquino nga unta ini nga pagsampa hin kaso han NBI kontra han nagpatay han iya amay in makakagduso hin iba pa nga testigos nga lumutaw gihapon basi maghatag pa hin kadugangan nga impormasyon. #
