Isumat.com/3:52AM, September 14, 2020
Magkakamay-ada hin Game 7 ha butnga han Nuggets ngan Clippers ha Western Conference Finals kataliwan la nga paglumson han Denver an hugpo nira Kawhi Leonard, 111-98, dida han ika-unom nga mulay basi makatabla ha 3-3.
Ini nga paka-igbaw han Nuggets in come-from-behind win tungod kay naka-abante anay hin 16 puntos an Clippers katapos han 1st half.
Pero waray matarantar an grupo nira Nikola Jokic ngan naghimo hira hin paagi basi makalanat. Dida han 3rd quarter, naghulog hira hin 30-16 nga bomba, ngan ginsundan ini hin 34-19 nga bunal ha last quarter.
Hi Jokic an nanguna han Denver pinaagi han iya 34 puntos ngan ginsuportaran han 21 puntos ni Jamal Murray.
Hi Paul Jorge in mayda 34 puntos, ngan 29 puntos naman tikang kan Leonard ha panig han Clippers.
An Game 7 in hihimoon dida hiton Mierkules, Setyembre 16. Amo gihapon ini nga petsa an pag-abri han best of seven Eastern Conference Finals ha butnga han Miami Heat ngan Boston Celtics.
An LA Lakers in naghuhulat han makakadaog ha asdangay han Nuggets ngan Clippers. #
