Isumat.com/7:39AM, July 8, 2020
Iginbuyagyag ni Police General Guillermo Eleazar nga mayda la gihapon nakaka-ikyas nga mga mulopyo tikang ha iba nga lugar nga nakakasulod ha Eastern Visayas.
Kun aton manunumduman, tikang han Hunyo 26 tobtob Hulyo 9, temporaryo nga ginsuspender an pagpabalik han mga Locally Stranded Individuals (LSI) ha Region 8. Ini in agud mabakante anay an mga Quarantine ngan Isolation Facilities nga puno na yana dara han damo nga nakapanguli hanhadi.
Nagsering hi Eleazar, nangungulo han Task Force Covid Shield, nga damo an report nga ira nakarawat nga mayda nagpapakalusot nga LSI tikang ha Luzon an nakakasulod ha Sinirangan Bisayas bisan igin-implementar an travel ban. Ini in dara kay nasakay hira hin pribado nga mga sakayan ha dagat ngan nadu-ong ha tay-aw nga mga lugar. Dako an peligro nga puede igdurot hini kay deri hira namomonitor han mga LGU, pahayag pa han heneral.
Kasumpay hini, iginmando niya ha mga personales han PNP nga arestuhon ini nga mga “Ninja LSI” ngan sampaan han kaangayan nga kaso.
Samtang, didto naman ha Ormoc, igpapaslak ha karsel an mga mulopyo nga nagpipinasaway ha Isolation Facilities. Hi Mayor Richard Gomez in nagmando nga mag-andam hin selda para hini nga mga tawo ha Isolation Areas nga deri nasunod han patakaran.
Nakasagap hin impormasyon hi Gomez nga may mga naka-kwarentina nga karuyag gumawas ngan magpahalayahay ngan kun deri hira gintutugutan, ira gintatarhog an mga personales han City Hall nga nagbabantay ha ira.
Sumala kan Gomez, iya igbabalhin ha karsel an mga pasaway basi didto na han selda igpadayon an ira kwarentina. #
