Ha atubangan han gin-implementar nga liquor ban ha Tacloban City, mayda la gihapon nagpinasaway…an resulta nagkalagong-lagong ha presuhan.
Ginkilala an mga nakatalapas han liquor ban ngan naka-alarma ha publiko amo an mga construction workers nga hira Reynaldo Aquino, 27 anyos, taga Albuera, Leyte ug hi Edwin dela Cruz, residente han Brgy 71, Naganaga, Tacloban City.
Subay han report han Abucay Police Station, nagtagay hira Aquino ngan dela Cruz kakulop, Marso 19, ha panimalay ni dela Cruz. Nagtikang an ira alsa-baso dida pala han udto ngan inabtan na ini han nagsisirom na. Dida hini, nagkaada na hin mapaso nga balingkutay an duha nga naka-arimutaw han sapit nga kabablayan.
Iginreklamo ini ngadto han mga barangay officials nga kadagmitan nangaro hin ayuda ha mga pulis nga dayon naman nag responde ngan ginkwelyuhan an mga hubog na nga mga suspetsado.
Gindara han mga otoridad an mga suspetsado ngan gin preso ha lock-up facility han Abucay PNP Station ug nakatalaan magbaton han mga reklamo nga igsasampa kontra ha ira. #
