Isumat.com/9:01AM, May 22, 2020
Aada yana an dako nga posibilidad nga maatubang hin kaso in usa nga babaye ha Catarman, Northern Samar dara han iya pagpasarang hin peke nga impormasyon mahitungod han COVID-19 ha social media.
An Catarman Municipal PNP Station in nag-iimbestigar na yana hini nga panhitabo ngan ginkumbida na nira an babaye ha ira opisina basi pamaki-anhan han iya ginbuhat.
Hadin Mierkules, an babaye in nag post ha iya facebook account nga mayda positibo han corona virus didto ha Catarman. Ini nga post in nagin rason hin kabaraka ngan pag panic hin damo nga katawhan.
Sumala han report tikang ha Catarman Municipal Information Office, igindiwara han babaye nga hiya an na post han notisya. Dida han pag-imbestigar han kapulisan, nagsering hiya nga iba nga tawo an naghimo hini kay ginkawat an iya cellphone. Waray tomood an PNP hini nga iya rason ngan ginsagdunan nga maghimo lugod hiya hin public apology.
Sumogot an babaye han sagdon, pero tobtob han ginsusurat ini nga balita, waray pa hiya mag public apology.
Sumala pa han report, iginka-istorya an babaye han Catarman Monitoring Team ug iya gin-angkon nga hiya gud an nag post ha facebook ug waray niya intensyon nga maraot. Nakasagap hiya han iru-istorya ha merkado tungod han covid-positive ug karuyag la niya nga makasabot an publiko.
Nagpahayag an Catarman Inter-Agency Task Force nga hapagkayana, waray kaso hin positibo han corona virus ha ira lugar. An syahan nga kaso amo in maiha na nga natambal han virus. Nagsagdon gihapon an Task Force ha ngatanan nga deri gud magpost hin bisan ano nga deri beripikado nga impormasyon labi na yana nga naatubang kita hin krisis.
An Catarman PNP in padayon yana nag-iistudyo kun sasampaan ba hin kaso ini nga babaye. An mga kaso nga puede igpasaka amo an pakasupak han Unlawful Use of Publication sugad man an Anti-Cybercrime Law. An sirot hini kun mapapamatud-an an kasaypanan in upat tobtob walo ka tuig nga kapresuhan. # (KEVIN SIOSANA)
