Kamarasa paghapi-hapi ngan pagtaragay labi na kun Domingo nga adlaw…waray gad unta problema kun deri liquor ban. An problema kay igindederi la anay an pagtagaytagay labi na ha gawas han panimalay. Pero kay waray man tumood han COVID-19 quarantine guidelines, ha karsel tumugpa in unom ka tawo ha Barugo, Leyte.
Dida han record han Barugo Municipal Police Station, naka-aresto hira hin unom ka tawo nga nakatalapas han liquor ban nga gin-implementar han municipal government.
May nagsumat nga mga residente ha kapulisan nga ganado an tagaytagay hin mga kalalakin-an, salit naghimo hin operasyon an kapulisan ug an mga suspetsado in nagkadadakop ha magkalain nga insidente hin irignom ha Brgy Minuhang ngan Brgy Cabarasan, kakulop Marso 29, 2020 banda alas singko an takna.
An mga suspetsado in ginkilala nga hira Reynaldo Ponferrada, 61 anyos ngan usa nga beautician, residente han Poblacion I; Pio Cabeltis, 55 anyos han Brgy Cabarasan; Pedro Rasonable Jr, 58, Brgy Minuhang; Floriano Orias, 53, han Minuhang; an 60 anyos nga hi Hermenigildo Acuin han District 5; ngan Dickson Niemes, taga Brgy Guinciaman han San Miguel, Leyte.
Narekupo gihapon tikang han mga suspetsado an makahurubog nga irimnon nga ira ginhaharampangan ug lakip dida han mga ebidensya kasumpay han reklamo nga igsasalawad kontra ha ira ha pagtalapas han liquor ban ordinance.
An mga suspetsado an igindeneter ha lock-up facility han Barugo PNP katapos han pag-aresto ngan dokumentasyon. #
(Posted 9:50 AM, March 30, 2020)
