Isumat.com/Setyembre 20, 2023
Tungod han agresibo nga mga pitad kontra han pagsarang han dengue, nagtikahabubo an kaso han impeksyon hini nga sakit ha Sinirangan Bisayas.
Ha pahayag han DOH-Regional Office, tikang han Enero tobtob Setyembre 15, 2023, nahipatik an 2,653 nga dengue infections ha bug-os nga rehiyon. Ini in haruhabubo hin 44 porsyento kun igtatanding han parehas nga panahon han nag-agi nga tuig.
Hadton Enero – Setyembre 15, 2022, nagkaada hin 4,719 nga kaso han nagkasasakit hin dengue ha Eastern Visayas
Para han yana nga tuig, nagmay-ada na hin siyam ka tawo an binawi-an hin kinabuhi tungod han dengue. An probinsya han Leyte an may gidadamu-i nga kaso han dengue yana nga tuig ug ini in umabot na ha sobra 1,100.
Igin-esplikar han DOH nga an pagmenos han ihap han dengue yana nga 2023 in tungod han temprano nga fogging operations nga iginsagdon han DOH nga himoon han mga lokal nga pangobyernuhan.
Gin-awhag gihapon han DOH an mga LGUs nga magkamay-ada hin regular nga panlimpyo han kalibungan ngan tagan hin atensyon an pagpukan han mga lugar nga amo an ginpupugaran han lamok nga nagdadara han mao nga sakit. # (via Philippine News Agency)
