Isumat.com/Hunyo 22, 2021
Usa nga konsehal hin bungto ha Leyte ngan usa nga kagawad hin barangay ha Tacloban an nagka-aaresto ha magkalain nga anti-illegal drugs operation han mga tinubyanan han balaud, kakulop, Hunyo 21, 2021.
An mga suspetsado in ginkilala nga hira Almar Balais, 67 anyos, ngan hapagkayana Municipal Councilor han San Miguel, Leyte; ug hi Marlito Fian, 68 anyos, residente ngan kagawad han Brgy 100, San Roque, Tacloban City.
Pasado alas 2 han kulop han magdumara hin buy-bust operation an mga operatiba han PDEA-Eastern Visayas nagresulta han kasikmit kan Balais ha Brgy 109-A, V&G Subdivision, Tacloban kun diin mayda niya balay.
Hi Balais nga nagin Vice-Mayor na hadto han San Miguel, in nakuhaan hin upat ka sachet hin gin-aalegar nga shabu, may timbang nga 5 gramos ngan balor hin 16 Mil pesos.
Iginpahayag han PDEA nga an konsehal in lakip han High Value Targets han ahensya. Iginbuyagyag pa han PDEA nga nadakpan na hadto ha parehas nga kaso hi Balais pero bumalik ha iligal nga aktibidad. An suspetsado in mayda operasyon han droga ha mga bungto han San Miguel, Barugo ngan Carigara, sumala pa han PDEA.
Ha luyo nga bahin, hi Fian in nadakop didmo mismo han iya barangay ha norte nga dapit han Tacloban. Lakip nga na-aresto an iya kaupod nga hi Rey Duran. Nakumpiskar tikang ha ira in tulo ka sachet hin droga kantidad hin 30 Mil Pesos.
An mga elemento han Tacloban City Police an nagdumara han nasabi nga operasyon.
Ha lain nga operasyon kontra droga, usa na liwat nga drug den an nabungkag han kapulisan ha Tacloban City hadin nag-agi nga adlaw. Ini nga drug den in namumutang ha Brgy 99, Diit, Tacloban City.
Hadton alas 3 han kulop, Hunyo 19, an mga otoridad an nagdumara han buy-bust ngan nadakop an mga suspetsado nga hira Wilon Camuen ngan Olivia Mae Moralida nga amo an gin-aalegar nga nagmementenar han lugar; ug naabtan didto hira James Vincent Boco, Virgilio Dadulla, Limuel Rosete ngan Christian Odron.
Narekupo tikang han mga suspetsado in upat ka sachet hin gintotoohan nga shabu may kabug-aton nga 10 gramos ngan kantidad hin 68 Mil pesos.
An mga gintatahapan dida hini nga magkalainlain nga operasyon in nakapaslak na yana ha karsel ngan nakatalaan umatubang han mga kaso kontra ha ira. #
