Isumat.com/8:07AM, Enero 25, 2021
Segurado nga damo an matagusya hini nga hitaas nga opisyal han militar tungod kay nagkamay-ada hiya hin awod ngan ginkarawat niya an iya sayop nga pagmalahi-una han Covid Vaccine ug nagdesisyon hiya nga bumaya nala ha iya posisyon.
Milagro daw ini…….milagro kun natabo ini denhi ha Pilipinas. Pero didto ini natabo ha nasud Espanya kakulop, Enero 24, kun diin hi General Miguel Angel Villaroya, an Chief of Staff han National Defense Department an nagdemiter ha pwesto tungod han eskandalo han panmakuna.
Sumala han report, nagbul-iw ha katungdanan hi Villaroya basi deri mahilambigit ha ka-arawdan an militar didto ha Espanya. Igin-aaligar nga an heneral ngan pira nga mga opisyales han gobyerno in waray makaghulat han ira turno dida han prayoridad nga babakunahan. Nagmalahi-una hira pagpabakuna han Covid-19 Vaccine.
Labot la kan Villaroya, mayda pa Regional Health Official nga nahisumat nagpabakuna na gihapon. Hapagkayana, gin-uuna panbakuna an mga edaran ha mga nursing homes ngan mga health workers.
Hadin nag-agi nga pira ka bulan, mayda gihapon Finance Minister ha Canada an nag-resign tungod han pakatalapas han health protocols han gobyerno. Hi Rod Philipps, an Finance Minister han Ontario, Canada in nag-resign tungod han pakasupak han patakaran.
Iginderi han gobyerno an pagkadto hin mga katitirok tungod han Covid, pero hi Philipps, upod han iya pamilya in pumakadto ha Carribbean Islands basi magbakasyon kun diin duro kadamo an tawo.
Kun aton manunumduman, denhi ha Pilipinas waray gud magpabantad hi Presidential Security Group Commander General Jesus Durante bisan kun aminado hiya nga nag-una na pagpabakuna an iya grupo bisan waray pa otorisasyon tikang ha Food and Drug Administration.
Hira Secretary Harry Roque ngan anay Spokesperson Salvador Panelo in nag-videoke ngan pumasyada gihapon ha mga resorts. Hi Senador Koko Pimentel in nadismis an kaso nga pakatalapas han health protocol han gumawas ha iya balay bisan kun gin-swab test na hiya.
Hi General Debold Sinas in na-promote pa nga magin PNP Chief bisan kun hiya an nagin sentro han insidente han “Mananita.”
An yinukot-yukot nga mga Intsik nga nagtatrabaho ha mga POGO denhi ha Pilipinas in nabakunahan na gihapon. #
