Isumat.com/7:47AM, June 7, 2020
Sobra na usa ka gatos nga mga Catarmananon an nakabalik ha ira bungto tikang han pira ka bulan nga ka-stranded ha iba nga lugar dara han igin-implmentar nga lockdown tungod han COVID-19.
Tobtob kakulop nga adlaw, 107 na nga Locally Stranded Individual (LSI) ngan 12 nga OFWs an naka-uli ha kapital nga bungto han Northern Samar.
Sumala han impormasyon tikang han LGU, an gibabag-uhi nga naka-uli amo in pito ka tawo tikang ha Manila. Kakulop han maagahon, umabot hira ha Allen ngan ginsundo han mga tinaglawas han Catarman.
Ginpatapod naman han LGU ha panguna ni Mayor Jun Rosales nga ira hihimoon an ngatanan basi deri magka problema an pagkabalik han ira mga residente. Iya minanduan an natutungdan nga mga personales han LGU nga areglaron gud an pagtimangno hini nga mga molopyo sugad man deri liwat angay pasibay-an an mga panginahanglan han mga frontliners.
An bungto in padayon pa gihapon nga nag-aandam hin kadugangan nga Isolation Units basi magamitan ingkaso magtikadamo pa an magkaka-uli tikang ha iba nga lugar. An mga Returning Residents in deretso igin-papailarum hin duha ka semana nga kwarentina tikang han ira pag-abot.
Iginkakalipay han LGU nga tobtob yana waray natatabo utro nga positibo nga kaso han corona virus ha ira bungto. An Catarman an syahan nga lugar ha Eastern Visayas nga nagka-ada hin COVID Patient pero maiha na hiya nga naka-recover ngan waray natapnan nga iba nga tawo. #(KEVIN SIOSANA)
