Deri maupay iton seguridad hit rehabilitation center hit City Social Welfare and Development Office hiton Siyudad han Tacloban ha Barangay Tagpuro hinungdan nga nag papagawas iton mga menor de edad nga nahidadabi hin mga kremin.
Ini an gin sumat ni Police Major Winrich Lim an Police Chief han Tacloban Police Station 2 ha interview han 99.1 IFM RMN Tacloban ha programa nga “Straight To The Point” ni Eduard Sanagan.
Sumala kan Major Lim nga baga la hin balay an mao nga rehabilitation center ngan waray ngani bisan alad hinungdan nga madagmit la nga na kakalusot iton mga mga menor de edad ngan nabalik la ngahaw pag buhat hin kremin sugad han pangawat.
Sumala pa kan Major Lim nga deri man liwat pwede nga prisohon hiton mga mga ka pulisan iton mga menor de edad mahitungod nga talapas ini han Republic Act 9344 “Juvenile Justice and Welfare Act” nga nag mamando nga deri pwede prisohon an mga menor de edad nga nakakag buhat hin kremin kundi ipapa ilrom la hin rehabilitation ipinaagi han Department of Social Welfare and Development.
Nahibaruan ni Major lim haiya panginano hini nga problema nga mayda hadton una mga pulis nga nag babantay han rehabilitation center pero waray na ini ha pagka yana mahitungod nga ini in pinan ngasohan hin kaso administratibo pati ha ombudsman tungod la hin mga hinimo himo nga istorya hin pag abuso kontra han mga kabataan.
An mga nag reklamo nga mga menor de edad kontra han mga pulis in amo la ngahaw an nabalik pag buhat hin mga kremin nga baga sugad nga an pulis pa an gin tatarhog para la hira in magpaka gawas ha rehabilitation center.
Kumo baton han mga insidente hin pangawat labi na ha downtown area han Tacloban nga nag dadabi hin mga menor de edad nag butang na hin mga pulis ngamag babantay ha napulo nga mga lugar nga sukot matabo in pangawat an Station 2 han Tacloban PNP.
Ha ilarom han mao nga balaud gin mamanduhan an mga local government units nga mag gahin hin 1 percent han ira internal revenue allotment para pag tindog hin rehabilitation center para han mga menor de edad nga makakatalapas han aton mga balaud.
Pero sumala han Juvenile Justice Welfare Council (JJWC) nga mayda la 63 nga mga rehabilitation center o kon “Bahay Pag-asa” an natindog ha bug-os nga Pilipinas tikang mahimo an mao nga balaud.
