Isumat.com/8:48AM, September 01, 2020
Usa han mga rasones kun kay-ano tigda an paghitaas han positibo han Covid-19 ha Tacloban an pagkulang han mga Personal Protective Equipment sumala han pahayag ni Mayor Alfred Romualdez.
Nagsumat hi Romualdez nga nagkaada hira hin hiruhimangraw kakulop upod hi DOH Regional Director Minerva Molon ug an mga administrador ngan nagdudumara han mga hospital ngan dialysis centers ha Tacloban. Dida hini nga miting, lumutaw an pagkulang han mga Hospital Grade PPEs nga amo unta an angay gamiton han mga health personnel.
An mga Health Personnel in kinahanglan Hospital Grade an gagamiton nga PPEs ngan deri an ordinaryo la nga klase hin mga higamit pagsagang han kagaw. Nagpoproblema an pribado nga mga hospital kay naabot daw hin Dos Milyones pesos an gagastuson para han de-kalidad nga PPEs ngan deri ini akos gastusan han ira pondo.
Dara hini nga segunda-klase nga PPEs, nagkakatatapnan an mga Health Workers ngan nakakatapon gihapon hira ha mga miembro han ira pamilya. Ini an nasabtan dida han nasabi nga miting.
Kasumpay hini, nanawagan hi Romualdez ha pribado nga sektor nga magdonar han mga Hospital Grade PPEs ngadto han mga nagkikinahanglan nga facilidad. Nagsumat gihapon an alkalde nga hi Majority Floor Leader Cong. Martin Romualdez ug an Tingog Party List in maghahataga hin ayuda nga mga PPEs.
Hinsabutan gihapon dida han miting nga mayda mga LGUs nga kulang hin ambulansya ngan behikulo, salit an natatabo gindudurungan pagpasakay ha ambulansya an mga pasyente nga iba-iba an sakit. Dara hini, an iba nga pasyente in natatapnan han pasyente nga posible may Covid. Gin-aghat ni Romualdez an mga LGUs nga magkaada hin lain-lain nga behikulo para han mga pasyente basi kaibitaran an pagitapon-tapon han kagaw.
Iginbuyagyag gihapon han alkalde nga kadam-an han kaso han Covid in nagtikang ha Dialysis Center tungod kay an mga pasyente in masayon la matapnan kay mayda nira iba nga sakit ngan maluya an resistensya. Ini nga mga pasyente in nakakatapon ha mga Health Workers nga segunda-klase an PPEs, ug ini nga mga Health Workers in nagdadara han kagaw ha ira balay.
Sobra 300 Dialysis Patients an gindadara ha Tacloban kada adlaw ug ini nga sitwasyon an nagpa grabe han sitwasyon dida han syudad. Pero ginklaro ni Romualdez nga abri la gihapon an Tacloban ha ngatanan nga pasyente tikang ha bug-os nga rehiyon nga karuyag magpatambal.
Naghangyo gihapon an alkalde ha publiko nga deri maghimo hin deskriminasyon ha mga Health Workers kay deri nira tinuyu-an nga matapnan ngan makapanapon han virus.
