Naabuyon an mga eskwelahan denhi ha Tacloban City nga magkamay-ada hin extension o pahilawigon pa an kwarentina nga igin-implementar han gobyerno.
Ini an iginbuyagyag ni Brando Bernadas, an hepe han City Disaster Risk Reduction and Management Office han syudad ha usa nga panmaki-ana durante han programa nga “Unang Radyo, Unang Balita” han 99.1 iFM-RMN Tacloban kanina han aga. An Enhanced Community Quarantine ha Tacloban in nakatalaan matapos dida hiton Abril 12, 2020.
Nagsering hi Bernadas nga nagkakapaprehas an panindugan han mga eskwelahan labi na an mga kolehiyo ngan unibersidad nga magkamay-ada extension han quarantine hin porlo menos usa pa ka semana. Sering pa ni Bernadas nga nagpapabilin an peligro han COVID-19 kun magkabalik na ngatanan an mga estudyante nganhi ha Tacloban tikang han magkalainlain nga lugar ha Rehiyon Otso.
Deri gud man kalilikyan nga maghuroot ngan magkatarutarampo an yinukot-yukot nga mga estudyante, magturutdo ngan mga personales han eskwelahan ngan deri na matutuman an social distancing. Ini nga mga estudyante in igkaka-urusa gihapon han mga pamilya han nagtatag-iya han mga boarding houses. Labot la hini, deri pa segurado nga bug-os nga Eastern Visayas in talwas na han makamaratay nga kagaw.
Waray na isyu ha mga elementarya ngan high school ha pampubliko nga eskwelahan kay gindesisyunan na nga tapos na an ira klase ngan bakasyon na hira, sanglit an problema yana in aada ha kolehiyo nga aada pala ha kabutnga-an han semester han suspenderon an klase, sering ni Bernadas.
Igindugang pa ni Bernadas nga usa ini han ginkokonsiderar ha Tacloban City COVID-!9 Task Force kun bubulkason na ba o igpapadayon an kwarentina paglapos han Abril 12. Ginklaro han opisyal nga makakawang la an paningkamot han syudad nga magin ZERO POSITIVE kun may taga iba nga lugar ha gawas han syudad nga posible nagdadara hana virus. Ngan puede liwat mahitabo nga may taga Tacloban nga makatapon hin taga gawas han syudad.
Hapagkayana, gintitirutimbang pa han Task Force an ngatanan nga konsiderasyon kun ano an magigin kabutangan han syudad ug an mga aktibidadis han mga residente pananglitan bulkason an kwarentina. Iginsaad ni Bernadas nga ha masunod nga pira ka adlaw, magdedesisyon na an Task Force nga pinangungunahan ni Mayor Alfred Romualdez kasumpay hini nga importante nga isyu. #
(Posted 8:45 AM, April 7, 2020)
