Isumat.com/12:32PM, October 1, 2020
Maabot an panahon nga deri na maa-akos han gobyerno an duro ka dako nga gastos ha pagtimangno han mga pasyente han Covid, sanglit kinahanglan mag-andam hini nga kahimtang an publiko.
Dida han iya pahayag ha iFM-RMN Tacloban, hi Mayor Alfred Romualdez in waray magruhaduha pagsumat nga deri na kaya han syudad an gastos ha mga Isolation ngan Quarantine Facilities labi na gud an pagplete han mga hotels.
Maabot an takna nga didto na gud la ig-aakomodar an mga matatapnan han Covid han gintudlok nga mga facilidad han gobyerno ngan deri na makakapahalayahay ha mga hotels. Nagsering hi Romualdez nga kun mayda tawo nga ma-insister nga didto ha hotel an iya kwarentina, ini nga tawo an magbabayad han iya akomodasyon ngan pagkaon.
Sering pa han alkalde nga haros 200 Milyones pesos na an nagastos han syudad para han pandemya ngan waray na pondo para han iba nga mga proyekto han syudad. Kasumpay hini, nanawagan hiya nga deri gud magpinasaway kay mag-aantos gud han ordinasyo nga kabutangan ha Isolation Centers an mga matatapnan.
“Pasensyahan nalang,” pahayag pa han amay han Tacloban. #
