Isumat.com/8:30AM, June 7, 2020
Napapayungan hin pagkahadlok an Rehiyon Otso dara han nagtitikadamo nga natatapnan han COVID-19, pero aada liwat an kalipayan nga nakaka-recover an nasabi nga mga pasyente ngan aada an swerte nga waray naa-awat nga kinabuhi ha aton dapit tungod hini nga kagaw.
Kakulop han kulop, malipayon nga iginpasamwak ni Tacloban City Health Office Dr. Gloria Fabrigas nga an ikaduha nga sample ni Patient EV46 nga taga Tacloban in nag negatibo na. Dara hini, nagsering hi Fabrigas nga puede na ini nga pasyente gumawas ha hospital ngan didto nala ha ira balay an mandatory nga duha ka semana nga kwarentina.
Ha luyo nga bahin, an LGU-Tanauan, Leyte in nag-anunsyo gihapon kakulop nga negatibo an sample ni Patient EV30 nga residente han bungto. Usa hiya nga nakatagamtam han Balik-Probinsya Program . Pero ginklaro han LGU nga kinahanaglan pa hin ikaduha nga negative result basi tugutan na hiya maka-uli ha iya pamilya. Ini nga pasyente in maupay an panlawas ngan nagpapabilin ha Isolation Area han munisipalidad.
Didto naman ha Samar Provincial Hospital, nag negatibo gihapon an sample ni Patient EV34 nga taga Tarangnan ngan gin-discharge hiya kakulop ha hospital ngan igpapadayon an iya kwarentina didto han facilidad ha Tarangnan.
Hadin Biernes, iginpasabot han DOH Regional Office nga lima nga taga Tarangnan an bag-o nga naka-recover ngaan negatibo na han corona virus.
Ha kabug-usan 25 na ka tawo an fully-recovered ha Eastern Visayas tikang han kagaw ngan mayda pira nga nag negatibo an repeat testing ngan naghuhulat han ikaduha nga negative result. 51 na katawo an natapnan han virus ha bug-os nga rehiyon.
Mayda naman sobra 1,300 nga Suspected Cases an padayon nga ginmomonitor han mga otoridad ha panlawas ha Sinirangan Bisayas.
Ha iba nga notisya, ginbulkas na an 48-oras nga lockdown ha Brgy Pangasugan ha Baybay City. Ini in dara kay negatibo an resulta han laboratory test han lalaki nga tikang ha Manila nga waray magpasabot ngan dumeretso pag-uli ngadto han barangay.
An Baybay City in may duha ka tawo nga nag positibo han corona virus ngan padayon naka kwarentina ha Isolation Facility han syudad. #
